紅豆婚紗 - 揀相日

中午我地先去五權西街的特色餐廳食lunch, 果度的餐廳真係好靚呀

間間都想試下, 最終揀左一間叫"桃花源", 食物同service都好好, 值得推介

兩個人加埋台幣800左右

買埋太陽餅手信, 就去紅豆

特登比約定的四點早到, 可以同可可玩一陣

佢真係好可愛>o<

 

玩到咁上下, rex就落黎, 話等多陣就有相睇喇

rex同我地講解一下點用個system, 就俾我地自己睇相

我地開頭都擔心, 影相時我地未必配合到rex, d相可能唔靚

但一睇到, 憂慮全消, 因為d相未執, 只係較過少少顏色, 已經好靚

雖然160張都可以要晒, 但要揀邊d入相薄都唔容易

我同男朋友一早打算加多一本相薄, 即係揀60張相

篩選左3次, 終於揀到60張

加左一本白色水晶本, 比想像中貴呢, 仲要俾NT3600 for 美編

不過有美編真係靚好多

其他兩本紅色同綠色都好靚架, 但我一眼就鍾情白色, 男朋友都係, 最終都係揀白色

另外亦加左NT3600全修檔

雖然用多左好多錢, 有少少心痛

但D相咁靚, 又影得咁開心, 不如俾多少少錢, D相真係最完美, 唔使第時後悔, 點解當初唔執埋D相

同埋佢地咁好, 感覺真係好似朋友, 係我地能力內, 俾佢地賺多少少, 當係一點支持

離開紅豆時真係好唔捨得, 好似唔捨得一個朋友咁, 最後悔係無同佢地影相呀!!! 

好想快D收到製成品, 等其他朋友見到我地輯相有幾靚, 幫紅豆宣傳下

我同男朋友都好想再搵紅豆影多輯相

亦希望佢地可以一直壯大, 但壯大時繼續維持這種親切友善的風格

因為這就是紅豆難能可貴的地方~

我同男朋友都覺得, 拍婚照最緊要開心, 照片先會靚

這次經歷, 真的為我們的婚禮添上一次難忘又開心的回憶!

紅豆婚紗 - 影相日

朝早9點到紅豆, rex同sasa已經係度喇

我地先食早餐

跟住sasa就幫我試一次尋日的衫

有一兩件要少少修改, 其他都ok

著起第一套衫, sasa就幫我化妝

sasa會問我鐘意咩類型, 同埋髮型、頭飾的接受程度

佢知道我鍾意簡單造型, 所以全日的五個造型都好簡潔, 好滿意

唔使擔心台式風格會好重, 因為sasa經驗很豐富, 會配合你的要求設計造型

但每個造型又會有不同變化, 我五個造型都好唔同, 可以有不同的效果

第一個造型係去泰安車站, 一套前短後長的婚紗, 再配布鞋

配上男朋友的短褲造型, 加埋佢地幫我地買的汽球, 就變左活潑感覺喇

這個造型, 都有d出乎我地意料之外, 但又幾好睇

輪到男朋友化妝, 好搞笑, 相信唔少男仔一生人會化妝的次數

一隻手數得晒, 拍婚紗相就係其中一次

sasa真係好專業, 又快手, 好快就搞掂, 可以開車出發了

去到車站先由燈光師阿宏教我地, 一陣rex的簡單指示

我地兩個半明半唔明咁就開始影相

男朋友係一個唔識笑的人, 但在rex同阿宏的專業搞笑能力下

張張相的笑容都好自然

rex同阿宏都會教你擺pose, 確保你的手臂唔會肥, 雙下巴不會露出黎

擺的pose好似好怪, 但其實當你見到完成品, 你就會知道果d拗腰扭膊頭係好有用

張相的感覺真係好唔同

阿宏亦係好專業的燈光師, 人很好, 當我們做不到rex的要求時, 又會再教我地點做

經常跑來跑去幫我地拎野, 每影一張相又擺好裙擺, 整好件衫, 確保個人係靚的

影完車站就去花海, 中途經過一個稻田, rex又會叫我地落車影幾張相, 真係好落力

到左花海sasa幫我換衫換髮型

果時正值中午好熱好曬, 但rex同阿宏一樣瞓身, 一樣落力引我地笑, 連中指都出埋

影完在花海換下一個造型, 今次景點係神社, 造成以典雅為主, 有少少懷舊感覺

在sasa的巧手下, 真係好靚

件婚紗簡直合晒我心中的the one要求, a-line, 拖尾有detail, 心口有摺位, 真係好good fit

超鍾意!!!

開車到神社中途又係經過一個蘆葦草田, 好靚, rex又叫我地落車影幾張

呢個就係紅豆的好處, 佢唔會限左一個景點, 即使隔離好靚都唔可以幫你影

可惜在神社影到後尾開始落雨, 越落越大, 唯有上車離開去下一個景點海邊

去到海邊雨一直下, 開始打定輸數, 好彩後尾雨勢變弱, 終於可以換衫影相喇

在車上換衫, 今次只係將長髮放落黎, 咩都無, 以自然為主

雖然落住雨, rex照樣瞓身, 再將雨景影埋入照片, 有另一種feel

為左捕捉海浪, 不斷影好多張, 呢d就係佢地的專業!

終於影完返去, sasa已打電話返去為我地準備炒飯同珍珠奶茶, 仲請我地食, 真係好貼心

食完野抖一陣就換最後一個造型影室內景

sasa幫我set左個不規則的髮型, 我無諗過影相出黎效果咁好, 亦無諗過自己適會呢種髮型, sasa真係好勁

終於完成一整日的拍攝, 好累, 又曬太陽又落雨濕身, 但過程係好好好開心

晚上不斷回想拍攝的過程, 好唔捨得呀

紅豆婚紗 - 溝通日

約左下午3點去溝通

早左少少到, 一去到已經有客人係度揀相

入到去坐低, 見到rex同sasa真人, rex負責同我地溝通

初初去到感覺佢地有d cool, 但傾落計就越傾越投契

rex與我地分析相片的風格, 由於我地太懶, 無帶溝通資料

rex就慢慢問下我地呢d鍾唔鍾意, 果d接唔接受到

我同男朋友好多風格都接受到, 除左要我扮cool, 我真係扮唔到

最終揀左(1)泰安車站、(2)花海、(3)神社、(4)海邊、(5)內景

跟住揀禮服, 由欣怡幫我, 燈光師阿宏就幫男朋友

先上樓上揀禮服, 我完全無概念揀咩好, 欣怡逐件問我呢隻色好唔好

佢地好好, 咩都無所謂, 想試邊件都得

跟住落樓下再揀婚紗, 又係想試邊件都得, 真係好nice

男朋友又係, 原本package只有兩套衫, 但佢地話真係無其他客人, 所以揀多兩套都無問題, so good

揀好衫再配埋景點, 過程都好順利, 好快就返去旅店

紅豆的禮服雖然唔多, 但款式好好, 好特別, 唔使擔心揀唔到

返去時同男朋友講, 個感覺好開心, 真係無揀錯黎紅豆影相

連男朋友都覺得感覺好好, 大家都好期待聽日的影相日

紅豆婚紗

其他的blog都要private, 只有pre-wedding系列唔會, 因為好想俾大家睇到, 紅豆婚紗有幾好!! 決定由頭開始與大家分享^o^

一直好想去台灣影婚紗相, 不斷上網睇, 究竟邊一間公司好呢

後尾搵到MASALILI, 風格好似好唔同

再睇落去, 提到佢地的JM, 都話佢兩個最受歡迎的攝影師已經自立門戶

開左這間婚紗店-紅豆婚紗

原本都有D猶豫

究竟台灣影相會唔會好貴呢?影得靚唔靚呢?

最終睇左其他JM分享, 再睇多兩睇紅豆的作品, 真係同香港好唔同, 唔似香港一式一樣的POSE, 價錢很相宜, 下定決心要搵佢地

原本打算11月生日時去, 天氣涼D, 又可以當旅行

後來知道要轉工, 未來一年都未必有時間請假

便趕在8月底去影相, 好彩佢地有檔期

便展開我們的六日五夜台北台中之旅