連埋半歲一次過寫啦！
6個月：7.46kg, 25生長線，高68cm
食
5個半月開始試固體
過程好順利，好快已經識開口同吞落肚
當佢食得幾次糊仔順利後
就加唔同生果俾佢試
婆婆仲心急，好快就俾粥仔佢食
糊仔我都係加生果，粥仔先+蔬果
試左的生果：蘋果、啤梨、香蕉
蔬果：紅蘿白、南瓜、節瓜、菜心
肉：三文魚、大眼雞
所有都肯食，食得好順利
慢慢再試其他
諵b由細到大係食方面都唔太需要我地擔心，係前排厭奶期食少左
到而家食固體仲鍾意多過食奶
已經食到一碗至一碗半粥仔
會主動尸擘大口等我地餵
仲試過嫌餵得慢同唔夠食大叫
而家一日5餐，4奶1固體
奶每次5-6安，比起厭奶期飲3-4安算好好
過半歲後餵人奶目標已經達成
每次泵奶依然唔多，得3-5安
早起泵奶好辛苦，出街又麻煩
但唔知點解自自然然會起身
唔知咩原因堅持落去
唔覺唔覺就過左半年
開始諗幾時停喇，應該不遠了
便便
諵b食一直無問題
反而便便令我地好困擾
半人奶的佢一直食開雀巢能恩
呢隻奶粉幾好，易消化、低敏
但唔知點解諵b食左無便便
一個星期至個幾星期先一次
雖然去的時候唔辛苦
又可能係吸收得好
但隔咁耐真係唔太好
最終幫佢轉左holle呢款有機奶粉
便便好啲變成3-4日一次
到開始食固體後，便便多左但辛苦左
試過太硬去到喊同有血
要用棉花捧幫佢
見佢咁辛苦心痛死我
唯有多啲餵佢食生果同飲水
最怕佢驚左便便唔敢去
反應
我記得婆婆同我講，我6個月已經識好清楚叫baba
我仲諗婆婆記錯
點知諵b 5個幾月時
有一晚無端端自己望住天花不停mama聲
開頭無為意，聽真啲係真係不停mamama
雖然知道佢無意識咁講，但已經氹到我好開心喇！
爸爸仲呷醋佢叫mama先
點知幾日後佢就baba聲，爸爸開心死
原來小朋友學野真係好快
到而家佢肚餓仲會不停mum mum聲
好搞笑！
反身已經可以收放自如
隨時隨地想反
呢個小朋友一反到身就好開心
會尖叫同不停笑
有時瞓著都要反
而家反完仲會手腳離地用肚仔頂住
好似想飛咁
唔知幾時開始爬呢
牙仔未出但成日牙痕
係咁食手咩都擺入口
其實我唔想佢咁快出牙仔
我覺得無牙的bb笑係最得意
已經由出世的輕磅b慢慢追到變中細碼，叻叻
拎玩具無問題
聽聲同睇野都pass
係腳仔唔太有力企
9個月瓊返去check
我唔太擔心，多啲返去check仲好呀！
不經不覺諵b就半歲大喇
除左講時間過得快，最想講係希望諵b唔好大得咁快
因為只有bb的你先會待在我地身邊
我地先可以分分秒秒陪住你
每到周末總係覺得時間唔夠，想過得慢啲
但每日返工又想時間過快啲
心情無時無刻都咁矛盾
諵b，我地最大心願都係希望你無憂無慮咁成長，做個開心健康小寶寶！
