15W2D Baby Boy!

上次私家照超聲波, 醫生話好易睇到

終於可以揭盅喇! 結果係仔仔呀

佢仲指左一指, 話呢度就睇到佢係男仔喇

老公同我都好開心, 不過最終都要等5月初照結構先百分百肯定!

 

一直覺得男女無所謂, 最緊要健康

人地問到想要仔定女? 有無預感係男仔定女仔?

我都會話無所謂, 因為呢樣係緣份, 係天賜的, 無得強求

更何況男同女係老公染色體話事, 長輩有咩期望都唔應該係我負責

 

而家知道係仔都好開心

老爺係長子, 老公係長孫

老爺間中會講漏嘴想要男孫, 話要返鄉下點燈

我係有少少唔高興, 因為男女都係孫, 女仔仲錫屋企tim

老公經常口講話無所謂, 但我估佢都係想要男仔

始終都有少少傳宗接代思想

不過我都相信即使係女仔, 佢都會好錫佢
佢仲話發夢見到係女仔, 所以都預左係女仔

而家知道係男仔後, 老公仲話咁你要生多個喇...
仲話其實女仔都好, 會好嗲好sweet
 

講番轉頭, 其實我一早係有預感係男仔

自己同小B傾計時, 有時都會衝口而出叫佢仔仔

人地話陀女會面色紅潤, 我就面青青

好彩係無變大鼻, 最唔好彩係成個肚都係毛毛….

行街睇衫明明女仔衫靚好多, 我反而不自覺會去睇男仔衫, 仲覺得好得意

最重要係12週照OSCAR, 姑娘照到BB兩隻腳仔時, 我見到中間係凸起左

不過當時我無問姑娘, o個時小B仲細未肯定, 唔想知道左最終唔同

我地又唔係真係好恨知道性別, 最重要都係小B健康成長

 

而家知道係仔仔, 可以買BB衫喇~

上次行GAP已經好想買, 快D特價啦!

Baby Boy, 爸爸媽媽一早幫你改左名叫雞蛋仔, 睇黎好啱你用呀~~

15W2D 3th私家產檢 + PMH見醫生

約埋同一日, 感覺好似無請咁多假

上午11:00先去私家診所, 一直好期待, 前一晚仲有D瞓唔著

因為今日有機會知道小B性別呀

 

去到登記左去食早餐, 食完返黎就好快到喇

陳麗燕醫生其實幾好, 有問必答, 好nice

唯一有一個弊處: 佢會睇內地人

診所每次有一半係本地人一半內地人, 所以多人d會等得耐d

不過佢收內地人對我無影響, 只要檢查細心ok就得la

 

早一日肚痾, 都有D擔心影響小B, 好彩無事

照聲波一照見到佢個側身, 跟住不停郁黎郁去, 好得意架

有一下仲見到佢個正面

跟住醫生度下佢的身長，睇下手仔腳仔

小B開始大, 要屈埋隻腳喇

跟住睇睇下就話性別好易睇啫…咁就揭左盅喇

 

下午老公返工, 我自己去PMH覆診

約左2:00, 1:45去到已經好多人

磅完重量完血壓就排隊

有個15min talk講母乳餵哺, 諗住無咁快到就聽下

好簡單講解左少少資訊就完喇

 

跟住出去好快叫名見姑娘, 等左陣就見醫生

一直有心理準備政府d醫生hea, 估唔到真係咁hea

坐到無腰骨咁, 不過hea得黎都肯答問題同做野

姑娘先幫小B聽心跳, 好大聲好快, 噗噗噗咁

跟住醫生入黎睇下個肚, 佢見我肚好多毛毛(拜小B所賜= =)

問我係咪有多囊卵巢症, 又問經期準唔準, 有無抽過血驗
我話之前睇醫生有提過但無抽血

跟住佢話幫我book 28週做妊娠糖尿測試, 我心諗有得做多個檢查無所謂呀~

跟住我問佢多囊卵巢症有咩影響, 佢話主要係不育, 但我而家無呢個問題
其次就係驚妊娠糖尿, 要到生左BB 3日後抽血先再驗係咪真係有呢個症

又問我私家有無照超聲波, 我話有, 但私家醫生無提過我有問題

跟住我問埋佢refer做產前運動班, 佢又ok

最後就將我個file轉俾助產士喇, 臨生之前先返去見醫生, 太好喇

 

今次見的助產士姑娘好靚女, 又nice又好人

會傾下閒計, 又會不斷問你有無疑問呀, 有下次寫低返黎問我地呀

一d都唔似醫生咁hea, 又唔會好似健康院d人咁串

入助產士小組真係好

 

講起多囊卵巢症…

其實我之前去家計會做婦科檢查, 個醫生都有提過

仲話瑪麗做緊個調查係關於呢方面, 叫我去抽血驗下

果時要等M到第一日去瑪麗, 時間地點太唔方便

加上醫生話如果順其自然一年都無BB先返去搵佢都得

所以最後無理到

好彩上天賜左小B俾我, 可以順利有BB真係一份禮物黎!

13W3D PMH見姑娘+入助產士門診

一直以為今次係第一次政府產檢

可以見醫生聽下小b心跳知道佢健康成長

點知….原來只係見姑娘

 

朝早8:30就去到瑪嘉烈, 仲有半個鐘先到登記時間

去canteen食個早餐, 15min食完就上去k座9樓

上到去原來已經有7個媽媽排緊隊, 好彩食快左

好快姑娘出黎趁我地排隊就同我地驗小便先

每次去產檢都要驗, 自己帶個闊口樽

姑娘俾張試紙放入去, 睇一睇無超標就得

 

入去登記完就自助式磅重同量血壓

過程幾得意, 姑娘可以慳少少人手

今次終於重左3磅, 同上次照oscar時一樣, 應該within標準掛

好快就入房見姑娘

Go through一次填好的問卷資料, 將老公資料入晒落電腦, 好快就搞掂

呢個時候只係9:30, 姑娘話等到10:30會有助產士講座聽, 可以食個早餐先

姑娘跟住話原來要再約1-3星期內見醫生

 

等聽講座期間有人叫名, 原來就係講解助產士服務

一般孕婦第一次醫生檢查無咩問題後，會轉介到附近健康院繼續產檢

到懷孕最後個幾月先返醫院由醫生檢查

而助產士小組就係, 孕婦只要屋企無遺傳病, 陀bb無特別情況, 就可以入

之後的產檢會由助產士跟進, 唔會去健康院

呢個服務其他醫院早d有, PMH啱啱開始

助產士姑娘一問我有無興趣, 我即刻話ok

佢話你可以唔使咁快決定, 返去諗下都得

我話我有聽過, 覺得幾好呀

姑娘就話如果醫生下次見完你無咩問題, 就可以加入喇~

跟住姑娘好nice, 又問下老公點解無黎、有無朋友係PMH生過bb

我話我自己係PMH出世, 朋友反而無, HAHA

 

其實一路諗住會入助產士小組, 見人地話助產士好nice

有唔明又可以問, 唔似醫生咁忙唔得閒答問題

到生果時助產士會好熟你的情況, 同你已經建立左關係, 對生bb時有好大幫助

雖然健康院好近屋企好方便, 但我唔鍾意健康院d姑娘態度唔太好

返PMH覆診遠d要搭車, 但我寧願辛苦d, 為自己同bb著想

 

聽埋講座11:30, 食埋lunch就要返工, 咁就無左一個上午

隔2個星期再返黎見醫生, 今日黎真係有d浪費

3月已經請左3次病假做檢查, 請太多都唔好意思

 

最後問番助產士姑娘上次度頸皮幾厚, 原來係1.18mm

雖然驗血報告未出晒, 但見到個數字都好放心, 小b應該ok ge

12W3D 照OSCAR

一直希望呢日快D到, 唔知係咪上網睇得多, 見人地度頸皮厚度好多都偏高
搞到自己都好擔心
前一日不同叫小B要乖乖俾姑娘度, 因為姿勢唔好都有機會影響結果

約左1:45返瑪嘉烈登記, 1:15就到左, 好彩買定雜誌消磨時間
坐下睇下短片第二個就到我
姑娘好nice, 簡單講解左唐氏個檢驗包括度頸皮同抽血, 好快就瞓上床開始

姑娘一邊照會一邊講呢隻係bb的手、腳, 中間白色閃閃下係心臟
跟住照到兩隻腳隻中間, o個刻有d想問係男定女
諗左1秒就決定唔問, 因為應該未係好肯定, 寧願肯定d先知
跟住姑娘話小b拗後左個頭, 佢用個儀器大力整我個肚等佢唔好咁大動作
整左一陣我問佢bb係咪郁緊, 姑娘話係呀
因為佢拗後左條頸, 要等佢落番黎果下先度到, 會度3次, 拎最後果次做準
我見佢度左3次, 個mon顯示都係1.X mm, 心即刻定d
跟住姑娘話頸皮厚度合格, 要等埋抽血結果
2個星期內無電話就即係ok, 臨走我再問合格機會大唔大, 姑娘都係話要等抽血
而家諗番我應該問下有幾厚, 唯有等12/3第一次產檢再問
好彩小b好叻, 真係放下心頭大石

今日照小b又大左喇, 有5.6cm
下次再見就等到3月尾去私家醫生度
到時15週唔知睇唔睇到性別呢~