細妹蓓蓓出世喇

超級懶, 真係無時間無心機寫blog
公司電腦又up唔到相
又唔鍾意用電話寫blog
結果就係荒廢晒...

其實細妹蓓蓓已經出左世100日
我都復工一個月喇
第二胎的時間真係過得好快
而家先慢慢blog番d重要時刻
先講番蓓蓓出世~

1月6日朝早起身去洗手間發現見紅
即刻沖涼換衫同老公落樓下食早餐就拎野入院
呢個時間有少少陣痛
大約10分鐘痛20秒但係唔規律


以為好快會再痛多D
結果呢種不規律陣痛經歷左一日半

1月7日朝早先開始痛長左
約10分鐘痛30-40秒但仍然唔規律
到下午5點開始再痛長左同痛楚明顯加劇
有少少痛到拿口拿面
7點開始痛楚再強d
老公黎探病時拿拿聲去沖涼
驚之後再痛多D就沖唔到
到9點再痛長左及痛多左，間中仲有d便意
10點半有D頂唔順叫姑娘檢查下
姑娘話宮頸鬆左ready喇
11點又再叫姑娘check
檢查後已經開左2度，安排落產房
即刻打俾老公返醫院去產房準備陪產
11:45落到產房已經開始大痛
姑娘俾埋笑氣吸

吸住笑氣個人真係好wing
會有一刻突然唔記得自己係邊
跟住下一秒又返回現實
我麻麻地呢種感覺
第二胎唔知係咪特別痛
凌晨1點半已經忍唔住好想生

但姑娘檢查只係開左5度
過多10分鐘終於開晒可以生喇

推左3-4次終於生左妹妹
出世重3.13kg, 重過哥哥都幾多喎~
唔知係咪吸左笑氣, 生完個人好眼瞓
唔似果時生哥哥時生完好興奮(生哥哥時無得吸笑氣)
姑娘好好咁幫我地影全家幅
等到4點度就推番落產後房休息

 

   

小小B性別

好多人都會話, 有個囝有個囡好圓滿
呢個都係我的心願
 


自己做女的, 都知道生個女會好窩心
將來痴家的多數係女

女仔D衫靚咁多, 但一定會破產
如果係仔就可以執哥哥尾, 慳好多

自己係大女, 由細到大都好想要哥哥
如果今次係女仔, 有諵B做哥哥照顧都唔錯喎

如果係男仔, 同諵B兩兄弟一齊成長又好開心

問過諵B想要妹妹定弟弟
第一次答要妹妹, 之後答要弟弟


不過當你陀過生過BB, 就會明白BB係天賜的
健康平安係做父母的最大心願
所以老公同我都覺得囝同囡都好
就交由上天幫我地決定

今次因為做NIFTY, 好早已經知BB性別

係知道BB性別前
都有小小第六感係男定女仔
最後結果原來都準喎(同諵B當年一樣~~)

話說姑娘打黎講NIFTY結果時
第一句已經話:
BB的性別係...女仔
當下呆一呆, 跟住就不自覺滲左2滴開心的眼淚
原來自己心底裡都係想圓滿一D有個貼心的囡囡
多謝上天的眷顧
不過冷靜落黎, 都係健康最重要
姑娘跟住講NIFTY pass晒就安樂晒
下一關就係照結構喇~

小小B出現前言 + Nifty檢查

隨住諵b過左2歲半+工作穩定
知道係時候準備小小B喇
加上我自己prefer猴B多過雞B (呢個純粹個人喜好 haha)
再唔開始就趕唔切
3月中定左同細妹去一轉韓國
諗住返黎就試下開始
4月開始如果一擊即中就係大B+猴B
5月先中就有一半機會係雞B
自己都係抱住順其自然心態
不過話係咁講
其實個心都會成日諗住

到5月頭臨m come前幾日
開始覺得腰痛
好似平時m come癥狀
但平時只會痛一日, 今次係幾日都仲痛
再加埋個人好攰, 果下都有諗係咪中左呢?
但又叫自己平常心, 過左日子都未黎先check
等多一個星期忍唔住check下
check前叫自己唔好有咩期望
但當見到條線漸漸出現時
果下心情真係又驚又喜
感恩上天再賜我個小bb

夠8週就去私家做檢查順便拎證明去醫院排期
諗住8週都唔遲丫
點知去到瑪嘉烈時, 職員話只係安排到中期唐氏檢查
果下都有D愕然, 無諗過咁多人生B

一知道無早期唐氏檢查做
就疊埋心水搵nifty or T21
格價後就揀左婦健
$4800包埋醫生檢查

差唔多夠12週就去抽血喇
婦健係尖沙咀, 係好多媽媽搵佢照結構的王紹宏醫生診所
上到去原來好多大陸人
後來發現可能因為婦健有得做檢查好早check到BB性別
所以特別多大陸人睇
我仲不停聽到姑娘接電話
用普通話解釋點樣可以做親子鑑定@o@

講番NIFTY
過程好簡單, 先抽血, 再見醫生照埋簡單超聲波
王醫生講野細聲D但有問有答幾好人
照超聲波的位置幾闊落, gel係暖架
同平時去開檢查的產檢醫生都幾大分別
搞掂姑娘話等5-7個工作天就會電話通知結果
咁啱第6日係公眾假期
我都預左假期後先收到電話
點知診所好好
趕得切假期前傍晚6點打俾我
結果一切正常^^

最搞笑係佢一打黎對完資料講報告
第一句係講BB係仔定女
之後先講染色體正常
我都預計唔到佢第一句就講性別
有D措手不及 haha

婦健雖然好多人
見姑娘接電話無停手
但態度好好, 好耐心解答
撇除多大陸人呢個因素, 去果度檢查都唔錯
所以拎NIFTY報告時都book埋係王醫生度照結構喇~

歡迎小小B

好耐好耐無update喇~
過去一年諵b N班開學
到我轉工, 適應新工
新工需要rotate到不同工作地點
又要重新適應人與事
呢一年過得好快~

話咁快諵b 3歲同K1已經開學
仲有另一個開心事就係諵b準備升級做哥哥喇~

隨住工作穩定落黎, 都係時候試下迎接小小b
同諵b一樣, 估唔到好快就成功左
驗到成功的一刻啱啱好係rotate去另一工作地點都一個月
好好彩呢胎同諵b一樣都係好攰但感恩未有其他妊娠反應
返工可以趁lunch time瞓半個鐘休息下


係呢度記番低個時序, 黎緊要逐一仔細記番d重要檢查：
5週:  驗到有左

8週:  第一次私家產檢, 到醫院登記, 安排唔到早期唐氏

12週: NIFTY檢驗+照超聲波

13週: NIFTY知道結果

16週: 政府中期唐氏

16週: 第二次私家產檢

18週: 第一次政府產檢

19週: 明顯胎動
20週: 結構檢查

而家啱啱過左20週

諵b對小小b的來臨好似越黎越期待

對做哥哥呢個身分暫時都好接受

成日話自己係哥哥唔係bb

又話要教小小b好多野

不過同時都有出現好痴身的情況

希望會越黎越好啦~ 

諵b兩歲生日快樂(一)

慶祝活動分兩場

前一日去左室內playhouse玩

咩都擔心一餐的我

猶豫過俾唔俾佢去玩好

驚呢啲室內playhouse好易傳播細菌

黎緊生日同返學

病一病計劃打亂晒

不過阿仔生日大過天

都想佢開心下

最後決定都係去啦！

地方幾大、多野玩

都幾新淨同乾淨

間中會見到職員拎住噴壺噴下波波池

好多大的小朋友

坐車周圍撞都要小心

唔太敢玩跳彈床

無其他小朋友會跳兩下

有其他人就坐埋一邊

呢邊係俾3歲或100cm以下玩

諵b都係鍾意去另一邊爬爬爬同sir滑梯

夜晚返婆婆度食飯切蛋糕

簡單訂左個美心cake

麻麻地好食

之前問親諵b幾歲都話一歲半

切完蛋糕終於識講自己兩歲喇！

諵b兩歲生日快樂(二)

正日係奶奶屋企搞小型party

本來諗住簡簡單單

結果原來都搞左幾多野

淘寶麵包超人佈置

呢間一歲party訂過

質素好好

淘寶氣球

仲有好多捧捧氣球無入鏡

Cupcakes and cookies

上年一歲都有訂

平時呢類曲奇餅我唔食架

呢間真係好好食

彩虹cupcake都好得

今年繼續支持

3磅生日蛋糕

呢間cake shop訂過幾次都無失望

本來要芒果餡

點知呢期無芒果賣轉士多啤梨

麵包超人造得神似

蛋糕軟熟又香

好食過美心好多

瞓醒覺的諵b仲係呆呆地

見到咁多人同佢慶祝仲未知咩事咁

慢慢先有番笑容

Our little boy

Happy 2nd birthday!

Papa and mama love you so so much!

請慢慢地快高長大

唔好大得咁快

等媽媽可以留住你的童年耐啲

830 BB 2nd Birthday Party

竹新鮮熱辣寫左先XD

2歲頭炮慶祝活動係同一班830 buddies開生日會

今年少左人

不過都有20幾個小朋友參加

我地一班媽媽日日係whatsapp傾計

又約埋一齊敗家（敗童書玩具）

大家都好好，亦好難得一班人維繫得咁好

有無留意個蛋糕少左個英文字？= =

唔止呀，個蛋糕黎到時頂係「1」字

我地仲以為送錯蛋糕

好彩有個媽媽咁啱有2字蠟燭咋，如果唔係真係好灰

雖然個蛋糕好食又抵，但真係彌補唔到錯字咁大問題

今年諵b大個仔

知道自己生日

心情特別興奮

夜晚問佢幾次今日開唔開心

都答「開心」

睇得出佢真係開心架！

今次party好開心，想快啲再約出黎玩呀！

仲有祝所有小朋友快高長大，健健康康！