聖誕節正日係我同老公結婚3個月紀念, 貶下眼就3個月
當日煮左個聖誕大餐, 兩個人係屋企靜靜咁過
說實話, 籌備結婚時發生磨擦, 都有一D唔好的諗頭出現過
例如"呢個人係咪真係適合一生一世?"、"第時點樣一齊生活? 點樣將自己下半生交俾佢?"
甚至有諗過係咪唔好結婚....
而家諗番覺得自己好傻
結左婚後, 感情好左好多, 9成時間都好sweet (當然都會有小爭拗啦~~)
婚姻真係要嘗試體諒及學習包容
一世人流流長, 唔好因為一d無聊事影響感情呀!
結左婚後亦嘗試做一個好太太, 學下煮飯~
我成日覺得唔係唔識, 係無機會煮啫
自從買左staub後, 再加埋之前買落的焗爐同LC焗盤呢D工具
真係煮飯興趣大增~
回想o個時LC旗艦店一周年做半價, 當時覺得好貴無買, 而家好後悔>"<
而家趁佢間中做特價入少少貨, 但始終比開倉貴呀, 幾時會開倉呀?!
因為有焗爐同煲, 煮的菜式都係以焗and炆為主
最大挑戰係聖誕節, 除左煮大餐俾老公食之外, 仲招呼埋好朋友
好彩好成功!!
最想多謝係blogger 鬼嫁, 佢的食譜真係好好, 我跟住煮出黎的菜式好成功, 仲好好味tim!!
我一有時間就會去偷師, 真係要叫聲師父架!!
當然仲有好多blog界的大廚, 你地的經驗都令我的廚藝知識增進不少, 無言感激
結婚淨左好多紅酒, 所以煮左個紅酒炆牛肋, 味道幾好, 但顏色唔靚同唔夠"杰", 要再改進
豉油皇煎大蝦, 憑感覺落調味料份量, 好彩出黎老公大讚好好味, 簡單易煮之選
肉醬焗茄子, from blogger鬼嫁的食譜, 好成功呀!! 朋友話好似街外食到的味道, 焗出黎個樣又靚
蜜糖焗雞翼, 前一晚醃定會入味d, 俾多少少心機搽2轉蜜糖, 出黎顏色會靚d
朋友聚會聖誕大餐~
仲有日式一品鍋, 係屋企樓下的阿信屋有好多日本野賣, 買左一枝牛肉鍋的汁料, 加水溝稀滾起再落材料煮熟就食得, 方便快捷! 老公一打開蓋都好驚喜話好靚, 又好味又colourful的晚餐~~
希望煮野食的興趣可以keep住落去啦! 兩口子食飯感覺好溫馨呀!
如果遲d有機會再讀書, 可能無時間煮喇~~