32W 8個月喇!

8個月當日係老公生日, 啱啱呢日出院

無食野幾日個人瘦左, 老公話連個肚都細埋

所以無影到相呀

拎番之前的相黎充撐下

而家33週幾, 個肚已經明顯大左

不過都係俾人話肚細

唔緊要啦, 最緊要bb size正常就ok

睇私家醫生都話bb屬中size

媽咪成日提我飲多d奶同食蛋

希望bb最後呢2個月大隻d

妊娠反應

可能因為休息左一個星期, 行少左

原本以為會越黎越嚴重的坐骨神經痛竟然紓緩左

無再坐坐下痺痛, 行路又無痛

最嚴重的瞓覺問題都輕微左, 舒服左好多

不過出現另一問題: 就係尿頻

feel到小b頭仔已經向下, 壓住膀胱

易急尿左, 夜晚開始要去起碼2次洗手間, 每次都好多咁

試過朝早5點去完洗手間瞓唔番

眼光光等到7點起身準備返工, 真係幾痛苦

身型

住醫院後體重無上升

so far體重都keep到醫院建議的重量

希望keep到生就好

好多人話我無咩肥過

其實自己知自己事, 點會無肥

成個身型骨架已經大左

好彩係不嬲上身無咩肉

而家多左都仲可以接受

同埋集中肥係下半身, 可以靠著褲或長衫遮住

塊面都變左發漲麵包喇, 用圓規劃得出的圓形

水腫問題都有出現
尤其是係收工後, 因為全日大部分時間都坐
好在未至於腫到著唔到原本的鞋
希望可以捱得幾耐得幾耐

戒口

本來已經食緊涼野, 例如花旗蔘水、西瓜、芝麻糊、腐竹雞蛋糖水

早產驚雲後就停左, 驚有關係

諗住34週後先再食番

我都想bb白白滑滑

到後期個人真係會放肆d

本來戒食朱古力, 近排食多左, 阿華田都飲密左

雪糕幾日食一次, 每次食少少

因為坐月就無得食喇

辣野都放肆左, 連老公都肯俾我食

不過濕毒野繼續全戒

踏入倒數階段, bb櫃仔終於送左黎喇
本來打算放假時洗下衫仔, 但落足一個星期雨呀...
唯有等周末啦, 同埋可以等工人黎俾佢洗
仲有好多濕碎野未做咁
工人的床舖都未準備
諗起就煩

 

櫃頂諗住放bb換片墊, 原本細妹俾o個塊竟然發左霉
要再物色過
側邊會掛個收納袋
擺棉花、濕紙巾、尿片、cream等濕碎野
方便換片換衫
bb真係好多衫, 希望3格櫃桶夠擺啦

31W4D 早產驚雲

呢篇blog要追溯番去17/7, 31w4d

當日中午去洗手間見到有少少淺啡色分泌

諗住應該無野既

到收工去洗水間時竟然見到有啡色血塊

有左咁耐從來未出現過

即刻話俾老公知, 決定去醫院睇下安心d

夠鐘收工即刻走, 搭車去瑪嘉烈醫院

搭緊地鐵時whatsapp同細佬妹講已經忍唔住喊

唔知bb咩事, 從來未試過流啡

出左地鐵匯合老公就搭的士上醫院

落車又喊

其實唔係真係好驚, 但好擔心

直接去c座地庫一樓的產房

禁鐘後姑娘問咩事

我自己都唔係好識講, 姑娘聽完問我幾週就叫我坐低換衫

老公幫我登記入院

換完衫聽一聽bb心跳, 再轉入產房病房

唔知係我好彩定係全部一樣, 我住果間係單人房

姑娘幫我駁好check bb心跳同宮縮的儀器

同我講話我有好頻密的宮縮

不停問我痛唔痛, 個肚實唔實

我其實唔識咩係宮縮, 所以答同平時一樣

姑娘仲話好密喎, 你一d都唔覺得?! er...我真係唔覺

醫生黎睇完d數據, 同我解釋左情況, 話bb有可能早產 (又忍唔住喊)

跟住照超聲波, 話bb而家重1.7kg

之後兒科醫生黎同我講早產有咩風險 (真係嚇死人)

決定要打強肺針, 同時食收宮縮藥, 希望bb等到強肺針有效先出世

打完針先食3次藥, 但宮縮無停到, 要再用另一隻勁d的藥, 吊藥36個鐘

中間唔可以飲水食野落床

咁啱入院o個日我無食下午茶, 結果真係餓足40幾個鐘
唔可以落床仲瞓到背脊好痛
又唔可以用電話, 驚影響儀器, 仲因為偷偷用俾姑娘發現收埋左....
只能夠睇雜誌消磨時間

不過好彩, 用左呢隻藥後宮縮少左好多 (醫生話大部分人都有效)

再加上我無痛, 最後可以轉番去產前病房觀察

住多一日就可以出院

度過左4日3夜的早產驚雲

雖然呢次經驗好嚇人

但都有好多體驗

PMH的醫生、姑娘同姐姐全部都好好人
有d會同你講笑, 見我睇雜誌仲話我咁悠閒 (因為其他媽媽都係準備生, 痛到典來典去)
有d係會惡少少, 但都係為你好
姑娘好盡責, 平均10 min入黎睇下d度數
又問下你痛唔痛

產房環境唔錯
佢地仲日日test緊笑氣系統, 希望趕得切9月有番啦

每日聽到至少5次大肚婆生b的真實情況
每次都係嗌幾下, 跟住一聲好大聲之後
就會聽到bb喊聲
充滿聽覺實戰經驗


不過呢d經驗真係可一不可再
希望小b乖乖, 係肚裡面住到足月先出黎
健健康康最緊要

30W2D 6th私家檢查

相隔一個月又去醫生度覆診喇

醫生話小b成長速度幾好

而家1.37kg, 大約3磅

唔會太大隻, 驚太大順產辛苦

頭圍同腳長都係30週

睇超聲波小b用隻手仔遮左小小面

不過都影到

今次睇阿b個鼻同口都好大呀

我有個大鼻+孖潤腸bb...haha

同之前的超聲波比較, 好似所有野放大左咁

一下子太大落差有d接受唔到

不過咩樣都好, 都係我的小寶貝啦~

之前都諗過俾錢照4D, 後來慳錢打消左念頭

寧願d錢用黎買bb有需要既野

而家咁睇, 呢個決定好正確, haha

黎緊要諗係隔幾耐覆診一次
只係睇bb大細同頭仔向下未
可以唔使check咁密, 慳番d錢俾小b
加上請工人支出真係好大, 諗起就肉痛