過去一個月心情真係好唔踏實, 甚至好擔心小b有無健康長大
呢個應該係好多準媽媽初期的擔心
不過當照超聲波時, 醫生一句: 呢個就係你的bb喇, 真係好感動
見到小b長大左, 已經成形喇, 見到佢的手手腳腳, 耳仔, 真係好得意
醫生話佢有4.09cm(上網睇11週bb長約3.8cm), size正常, 發育都正常, 即刻放下心頭大石
我同老公望住張相都好開心, 覺得小b好得意, 好努力咁成長緊
妊娠反應:
touchwood講句小b好乖, 我完全無強烈的妊娠反應
無嘔、飲食正常, 連作悶都3隻手指數得晒
睇醫生時問我有無食唔落野, 我話無, 好正常, 醫生話個個都會呻到樹葉都落, 我竟然無咩反應, 係10中無1
但有時我同老公講, 寧願多d反應, 等我知道小b好努力咁長大中
不過其實都唔係完全無反應, 但d反應唔係最常見, 所以唔知關唔關事:
最辛苦係初頭的便秘, 但而家已經好番好多
到最近開始pat pat位置的骨好痛, 可能行路姿勢唔好, 以前都有少少呢個問題
但最近嚴重左好多, 連瞓覺都痛醒, 轉身的時候最痛, 痛到要托住黎轉, o個刻驚到以為自己會行唔到
瞓醒一踏落地o個下又係好痛, 但慢慢行多兩步就會好好多
睇醫生時問過, 話係子宮要生長, 俾小b多d空間, 令到韌帶擴張的反應, 懷孕後期可能會更加強烈
可能加埋舊患, 所以我早期已經咁痛, 應該成個孕期都會係咁
身型:
一向三餐無節食, 食量正常, 有左小b後維持住, 下午茶時間會肚餓食多包餅或者生果
老公同我自己都覺得食多左野, 再加埋過左新年, 我都擔心會重幾磅
人地話初期體重變化唔可以太大, 因為小b後期會成長得好快, 體重自然會增加好多
去睇醫生時戰戰競競咁上磅, 竟然無重到, 同上次一樣
可能因為工作太忙碌, 個人唔夠休息, 所以無增磅
不過下次見醫生時應該要重喇, 始終小b都要有個舒適的成長環境
肚開始脹, 但似係食到好飽咁, 加上平時好少著貼身衫, 所以暫時返工無人見到個肚
肥得最多係pat pat同大腿, 平時已經係重災區, 而家直情慘不忍睹
戒口:
咖啡因: 咖啡、茶完全戒晒, 朱古力戒左9成, 但新年真係忍唔住唔偷食, 都係食左一粒金莎, 同食自助餐時食左幾啖朱古力甜品
生野: 海鮮全戒、壽司開頭以為淨係唔食生既就得, 後來聽人講處理時都有機會感染到細菌, 而家所有都唔敢食, 沙律都係
生野真係要戒晒, 唔係中醫角度的寒涼、怕bb皮膚唔好等原因, 而係怕有菌, 嚴重到可以無左小b, 唔搏得
其他: 芒果、菠蘿等等基本上都唔食
上面既野自己會自動戒, 但有一樣真係好難戒, 就係辣
我真係好鍾意食辣, 基本上只要樣食物係辣, 我都覺得係好食, 要全戒談何容易
偏偏老公好緊張, 咩都唔食得, 一見我食辣就話
有2次食米線, 忍唔住叫酸辣, 盡量唔飲湯, 食完都好內疚
有時越唔俾食就越想食
其實我奉行唔需要完全戒清晒, 除左未熟的食物, 其他好想食時食少少都唔怕
自從有左小b後, 同老公感情好左, 老公好錫我
呢日睇完醫生我去洗手間, 無意中見到老公拎張超聲波相出黎睇, 自己微微笑, 唔知點解我都好感動
知道老公一樣好錫小b~
同事同上司見我近排戒口, 都估到我有左bb
不過始終未夠3個月未講得, 仲有1週就夠喇, 到時唔知點開口...
黎緊要等3月5日號去醫生check oscar, 又係另一個要過的關口
小b要加油!
