Yan。Nam B。Blog: 12月 2010

2010年12月21日星期二

Confirmed-gown shop(3)

對比其他jm, 我行的婚紗舖數目真係小巫見大巫, 我只係參考人地(多謝blogger suet的超詳盡婚紗店指南, 真係好有用), 再篩選覺得啱自己的舖頭去睇, criteria有以下幾個:

1. 價錢唔能夠太貴

我明白一分錢一分貨, 但唔想out-budget, 想好好運用d錢, 用o係覺得值得的地方。所以凡係價錢out-budget的唔去睇, 有d好鍾意的舖頭都要忍住唔去。雖然免費試唔使錢, 又可以著靚衫, 再加上一世人一次, 但呢個理由唔能夠濫用, 靚o既野可以無止境, 價錢亦都係。

2. 價錢唔能夠太平

都係一分錢一分貨的道理, 我又唔想為左慳, 要自己著住d接受唔到或者一睇就知好平的衫, 真係過唔到自己果關。所以要取個平衡, 金都一定唔睇, 太平o既都唔會睇, 唔想浪費時間。

3. style要simple and elegant

唔想著到好似登台咁, 好驚幾年後, 或者仔女大個時見到指住黎笑, 不過可能20年後興呢d款都唔定...haha。最鍾意歐洲款, 真係靚好多架。雖然我擺酒樓唔係酒店, 但個場都好靚好grand, 西式唔中式去完台灣影婚紗相後發現台式衫都唔錯, 果時影相的婚紗同晚裝我到而家都好鍾意, 亦比我想像的更好, 所以台灣舖頭都可以考慮。

最後選擇:

其實係grandness同RHP中二選一。

Grandness:

1. 好鍾意grandness的婚紗, 尤其是果條半魚尾款, 好靚好清。可惜拖尾唔係好鍾意, 感覺too much

2. 價錢亦好相宜, 仲可以一條龍租晒褂、男禮同伴娘

3. 唔擔心揀唔到婚紗, 因為10條有5條都靚, 又係a-line款, 都係鍾意的style

4. 服務好好, sales會叫你返去考慮下, 唔使急住決定

5. 地點方便, 始終尖沙咀, 還衫拎衫都方便過港島

6. 但係晚裝款太少, 顏色選擇亦少。雖然婚紗緊要d, 但晚裝只揀到一件紅色魚尾款, 個款好靚但過於simple

7. 有一條龍係好, 但男禮同褂選擇唔多, 出去租價錢貴少少, 但我好著重裙褂, 出面的款相對多d靚d

RHP

1. 款同質料都中上, 尤其是晚裝, 簡直念念不忘

2. 婚紗款式多, 亦唔擔心揀唔到; 有內置girdle, 著nu bra就得, 舒服好多, 又有瘦同靚的效果

3. 價錢相對較貴, 但合乎budget

4. Package自由度較大

5. 地點偏遠, 始終要過海無咁方便

6. 擔心服務質素

最終, 我揀左RHP, 因為怕grandness揀唔到晚裝, 一條龍服務亦未必享受到。RHP的衫亦在令我念念不忘, 唔join怕後悔, 目前service都好ok。加上試衫後決定可free upgrade一件, 遲左就無喇。因此, 我join左RHP 2件的package先, 如果揀到婚紗當然好, 揀唔到既, 唯有俾多d錢去grandness租。不過呢個只係最終選擇, 因為咁做又會用多左錢喇!!

決定左RHP好開心, 到呢刻都覺得無揀錯, 好期待第一次trial, 到時要試衫hold衫喇!!

2010年12月19日星期日

Confirm-gown shop(2)

(6) RHP

終於黎到港島區喇! 呢間舖頭係我的MUA介紹, 從佢的口中同上網的人的評語, 都知道呢間舖頭的衫係好靚, 但態度上有少少問題。不過我對呢間好大期望, 因為態度改善了, 價錢同質素都係可接受之列。

上到去環境好舒服闊落, sales態度都好好, 逐一介紹佢地的婚紗有咩特別同款式係點, 望落去質料真係唔錯bor。因為朋友未到, 得自己一個, 決定睇下相簿先, 婚紗款式都好多, 但我覺得要試上身先知道真係的效果係點樣。再睇埋晚裝, 佢地的晚裝真係令我印象難忘, 好靚好特別, 仲有好多色揀, 最重要有好多我好鍾意的黃色, 絕對唔使擔心揀唔到。等唔切朋友到, 先揀左兩件婚紗試, sales好好俾多件晚裝我試。先試晚裝, 係紅色半魚尾下擺好多立體玫瑰花, 著上身, 半魚尾好靚好鍾意, 不過條裙好重, 好似想向下跌咁。跟住試婚紗, 兩件婚紗都係之前未試過的lace同紗款, 仲要著小鋼紗, 不過RHP的鋼紗唔係一個個鐵圈, 而係好挺身的紗, 所以都OK。第一件心口好多釘工, 另一件就簡單d, 胸口下有一排銀色珠，兩件拖尾有d似, 都係好多lace, 聽sales講兩件都好受歡迎。心口好閃的一件, 腰間有橫摺會顯得瘦d, 加埋佢的內置girdle, 果然著出黎好瘦, 再戴埋長頭紗, 雖然唔係我好鍾意的style, 但都幾靚bor。試緊第二件時朋友到左, 不過呢件無第一件咁靚。最後睇埋package, 即日confirm可以free upgrade一件。

價錢以中上環黎講唔算貴, 質素亦好ok, MUA果然無介紹錯。Package的衫可揀婚紗同晚裝, 變化會大d, 我覺得RHP的晚裝靚過婚紗, 好彩睇相簿, 佢都有好多絹質的婚紗, 唔怕揀唔到。不過RHP好似想客人揀lace婚紗多d, 話絹會易皺, haha。

(7) Unique

呢間去到同相像中好大出入呀, 唔似中上環的格調, 入到去覺得似金都感覺@@睇相簿婚紗款都揀到幾件出黎, 晚裝真係唔太揀到…不過凡事唔能夠睇表面!拎出黎的婚紗, 靚過睇相好多!!好閃好新, 用料睇得出唔錯, 著上身感覺亦好好, 好靚, 試左兩件都好滿意!!

再試多件好淺黃色的晚裝, 個款唔係咁鍾意, 不過係我喜歡的黃色, 即管試上身。估唔到試上去又幾好睇喎, 就咁睇個款有d娘, 但著上去個cutting幾好, 反而有d飄逸感覺。雖然婚紗好ok, 但係未到我好鍾意, 同埋我覺得適合戶外著多d, 所以都唔會考慮喇~

呢間價錢唔貴, 但令我深深明白到”人不可以貌相”, 睇相真係唔準, 所以一定要親身去試衫。

(8) Kaamma Wedding

離開Unique經過一座商業大廈, 見到地下放左個易拉架, 見下一間未夠鐘, 即管上去睇下先。上到去office細細, 但都好整齊, 仲好好招呼有水飲。跟住揭下衫, 衫款應該係自己設計, 出面未見過, 但唔係好適合我。招呼我的係老闆娘?好好人, 可以俾個優惠價我, 可惜無時間試衫, 加上style唔啱, 所以就離開喇!

(9) Bliss

最後一間要去朝聖, 去左中環雲咸街的bliss。由中環行上去, 要行一條長命斜先到, 我朋友話如果我真係o係呢度租, 佢唔會幫我還= =上到去見到聞名已久的男designer, 果然係有designer的風範婚紗望上去唔多, 但條條都勁靚, 係用料同cutting都一望就知好好, 係去過咁多間最好。再望埋另一邊的晚裝, 心裡面真係低呼「好靚」(可能好多中環舖頭都係咁, 但無辦法, 我係大鄉里出城…)designer了解左我的喜好後, 幫我揀左一條organsa(就係上一篇講好鍾意果款質料)同一款全lace。Organsa果條仲要係我好鍾意有摺摺的心型胸, 前面睇真係符合晒我的the one要求, 後面拖尾略嫌少少唔夠simple, 但已經好滿足。雖然所有野都係我最鍾意, 但竟然無叮一聲的感覺。我朋友亦話: 「條裙係好靚, 但著上身唔襯你, 因為你太鄰家女孩, 條裙搶左你的光, 似係衫著人唔係人著衫。」人世間之事咁樣莫過於最灰, 最接近完美的明明係眼前, 可惜唔啱你, 世事果然唔能夠勉強再試埋另一條全lace, 你會知道靚的lace同cheap的lace的分別有幾大, 佢用既係古典lace, 再加埋半魚尾, 真係靚到dup一聲。我的朋友話:「著半魚尾先令我有番女主人的感覺, 好有壓場感。」其實我自己都覺得, 一著半魚尾, 感覺好似上身咁好唔同, 我真正知道咩係最適合自己。

呢間的婚紗真係令人「嘩」一聲(再重申, 真正貴價的中環舖頭我只係去左呢間, 我眼光好窄, haha), 係好好好鍾意。可惜, 價錢太貴…如果我係5星級酒店擺, 我一定會係度租衫, 可惜我要向現實低頭(婚禮好多堅持為了現實已經低左好多次頭, 好多都放棄左…因為我寧願將錢用係實際的地方, 例如度蜜月), 呢間只可遠觀。亦因為咁, 我一早決定唔去其他舖頭, 因為我知去左只會令自己攞攞攣!!

我的最後選擇…下篇待續

Confirmed-gown shop(1)

仲有9個月, 係時候認認真真去睇婚紗禮服喇, 決定先去尖沙咀, 再去上環睇下

我的要求係simple and elegant, 好鍾意satin, 好似外國的新娘子咁, 真係好靚。可惜試左咁多間, 我朋友話我個樣太鄰家女孩, 揀d太simple的款只會令我結婚果晚唔似一個主角, 同埋我著satin太成熟好彩, 俾我發現一款裡面係絹, 出面有一層紗的質料, 後尾仲知道佢叫做organsa, 我決定以呢款為藍本去搵我的婚紗。

<--就係呢款喇

(1) Ballroom

第一間係好有期望的ballroom, 因為夜晚上去, 睇唔到好多人話好靚的海景, 不過就飲左一啖花茶, 真係好好服務。睇相簿好多衫同婚紗款都好大路同ok, 呢個時候的自己仲係未知應該揀咩婚紗同禮服, 所以咩都試下, 最後揀左件心型胸、下身好多層紗的婚紗, 同一件黃色的禮服試。

款式同cutting都ok, 好穩陣, 但未令到我留好深印象, 價錢中等, 好在無分grade。不過呢間只係我第一間真正試的舖頭, 所以未做決定。

(2) Idee Elegant

跟住去左同一幢樓的Idee Elegant, 上黎之前已經知道佢的款係簡單歐洲款, 價錢仲唔平tim。店內衫的數量唔多, 唔知係咪收埋左係倉呢?幫我的sales好好人, 好有心機, 最後試左一件相信好多人都試過的婚紗, 心口同下身都有好多花花既, 試上身好靚呀, 但好似唔太啱我, 仲試左條桃紅色魚尾, 原來我著魚尾都唔會好成熟, 同埋都幾好睇, 不過fit身的魚尾裙, 要行路真係有d困難...

佢的款都有分grade, 我試的除左魚尾果件, 婚紗同晚裝都係upgrade款, 好貴呀。第一次上去confirm可以free左晚裝的upgrade, 婚紗upgrade就半價, 好人sales仲俾我hold呢個優惠2個星期返去考慮下。最後我都係無揀到呢間, 近排收到舖頭sms, 年底前confirm可以free晒全部upgrade, 都幾抵喎。

如果鍾意簡單高貴成熟款呢間就好啱喇!!不過要小心upgrade價錢, 因為可以差好遠架~

(3) Hsiao

sales Toby好好人呀, 好爽又好傾, 呢間係台灣舖頭, 佢的晚裝好多款好多色, 全部A-line款, 又係唔使擔心揀唔到。package好flexible, 無分upgrade, 拖尾加$500, 果排係expo所以可以free, 首飾都free。

呢間的晚裝好ok, 但婚紗就普通啦, 所以都可以列入後備之列。

(4) Grandness co.

呢間上到去感覺好舒服, 上到去先睇下相簿, 婚紗款式好靚, 好易揀, 相反晚裝就款好少同顏色唔多, 好難揀...決定試兩件婚紗同一件藍色晚裝, 因為未試過藍色, 試完可以知道自己啱唔啱喇。兩件婚紗都係舖頭的新款, 第一件睇個款, 我唔係好鍾意個下擺, 好似太多野, 點知試左上身好靚, 睇得出係cutting好好, 我第一次試半魚尾款, 原來好靚架!! 唔會好似A-line咁普通, 未必人人著得好睇; 另一件都係類似款式, 但就係A-line款, 即刻覺得第一件啱自己多d。跟住試下藍色晚裝, 條裙好靚, 但我著藍色一d都唔好睇, 好似老左好多年咁...最後sales好好人, 俾多件紅色晚裝我試, 呢條應該上去的人都好大機會試過, 個款好簡單, 只係腰間有個蝴蝶結, 但好靚, 仲可以修緊d改做魚尾款, 好good呀!!睇埋package價錢, 佢有一個package包埋卦、男禮同伴娘裙, 一件婚紗三件晚裝都係7xxx, 好抵呀~

呢間其實我好心動, 因為件婚紗好靚, 前面好清好高貴, 不過拖尾部分太多野, 唔夠simple。價錢好好, 再加埋無分grade, 所以當時決定, 如果我去完港島搵唔到, 就會揀呢間喇!!

(5) Elegance

呢間係下年結婚的朋友租的舖頭, 上網睇過佢的款, 都覺得好靚, 所以都有d期望架。去到已經有好多衫掛左出黎, sales俾左部ipad我地睇款, 而家真係先進又方便。款真係好多好多, 好似睇極都睇唔完咁, 我地都寫左好多出黎。但係唔知點解, 試上身感覺好唔同, 雖然款式都係熟口熟面, 但係之前試的幾間靚好多。我朋友話係質料同cutting問題, cutting我唔識睇, 但質料我覺得係無咁好。最後sales講解完package, 就話即時join可以平$500, 同埋free左平d果級的upgrade。我地其實好想走, 但個sales不斷游說我地, 我覺得感覺唔係咁好。

係呢間絕對唔使擔心揀唔到款, 因為實在太多...價錢亦唔貴。但我覺得佢的質素比起之前睇幾間都無咁好, 加上推銷手法令我有d唔舒服, 所以不列入考慮之列喇~

(6) L'amour Bride

係網上睇到呢間新開的日式婚紗, 覺得好特別, 所以臨時臨急就上左去睇衫喇。上到去感覺好舒服, 仲見到傳聞中靚仔靚女的老闆同老闆娘。又係可以ipad揀衫, 佢地的款式真係好特別, 好多花花, 迎合日本"花嫁"的意思, 睇實物睇得出款式同質料都好好, 亦唔使擔心同出面的舖頭撞衫, 人地見到呢d款一定會覺得好特別。我好鍾意佢地一件婚紗雜誌的款, 膊頭有一朵大玫瑰花, 全身純白色絹料, 真係好型。不過呢日同左另一個朋友上黎, 我想俾陪開我睇衫的伴娘睇埋, 所以無試到, 打算再約時間上黎。

呢間的衫係好靚好特別, 但未必符合我的simple、elegant的要求, 加上價錢唔平, 所以都係諗定d先~~