11月7日(五)
今日去九龍塘面試
係少數九龍塘有報的學校
想當日交表我係同上司情商偷d返工時間
趁lunch time由觀塘飛的過去
去到仲要烈日當空排45min先交到表
跟住再飛車返公司
今次面試仲要係星期五下午
特登請半日假
申請呢間學校成本好高= ="
呢間連鎖幼兒園報讀人數應該過千人
其實預左諵b無機會架
不過當去見識下都好
去到一個家長去聽講座
一個家長陪面試
九龍塘學校空間真係大好多
硬件設備係地區幼稚園無得比
軟件方面, 雖然係大型連鎖幼兒園
但由交表到面試感覺校長同老師都幾nice
校長係交表當日仲係親身拎住大聲公由隊頭行到隊尾講解交表程序
感覺好親力親為
入去面試前因為等得耐
諵b有少少扭計
我就拎左張貼紙仔安撫下佢
點知搞到佢玩到唔放手
連坐低面試時都唔太理老師自己繼續玩
係mama我失策左
面試內容:
兩個老師interview, 一個同小朋友交流, 一個旁邊mark分
1. 手偶公仔: 一去老師手上已經套住左個公仔, 叫諵b握手, 諵b唔知咩叫握手, 但有用手指篤隻公仔, 再叫佢hi five, 平時我地同諵b係講yeah, 我有係旁邊教佢同公仔yeah, 不過佢無反應
2. 問佢邊個同佢黎, mama係邊: 無咩反應
3. 玩具疊高: 諵b弱項, 老師示範俾佢睇疊高, 佢不停將d玩具拎起遞俾我, 叫我做
4. 生果配對: 老師拎左張貼左橙蘋果香蕉的板出黎, 再拎隻真香蕉叫佢擺番落去香蕉幅圖, 諵b一見到隻蕉就想擺入口, 再係咁遞俾我叫我meet俾佢食, 老師問佢拎佢唔肯, 要用個橙交換, 最終都做到擺隻蕉落幅圖度
5. 認動物: 諵b平時認得狗仔、貓仔、panda、bear bear熊, 面試時唔俾反應老師
6. 送禮物: 老師送左隻公仔鎖匙扣, 諵b應該唔太like, 俾佢就遞俾我, 我俾番佢就擺係枱面XD, 更加無講謝謝
7. 無講bye bye, 仲想拿拿聲逃走
呢次面試最失敗係我俾左張貼紙佢
搞到佢開頭分心唔理老師自己玩貼紙
其他都係一貫表現啦~
11月8日(六)
星期六又係面試的日子
今日要見兩間
一間有學券一間無學券
兩間我都鍾意架
因為都係重視語言的學校
有學券果間仲係少數有外籍老師的學校
又有全日班
原本好心儀, 但見完後感覺唔良好
所以面試其實都好重要
學校揀學生外, 亦係家長感受學校的好機會
有時口碑同真實感受都會有出入
無學券學校
呢間係比較新的學校
地點係正婆婆屋企同返工附近
位置好理想, 但可惜得半日班
成功讀到都要睇下婆婆夾唔夾到
無學券學校黎講學費唔算貴
一年交10期, 無雜費, 都幾難得
每班有雙班主任, 一個外籍一個本地
學校環境又大又新
睇得出校長好有心搞好學校
係我同老公面試幾間學校後一致感覺最好
網上睇comment全部都好, 話小朋友讀得好開心好鍾意返學
唯一缺點係無升小record
但呢樣對我地影響不大
面試過程簡單, 係等的時間較耐
學校安排左遊戲室俾小朋友玩住等
仲可以去playgroud玩車車
地方真係好大
諵b玩到唔想入去面試, 抱佢走仲尖叫= =
面試內容:
1. 疊lego, 老師用兜仔裝左幾粒lego俾諵b叫佢疊高, 諵b都有玩開lego, 但佢見到個兜係咁玩個兜, 最後將d lego放入兜到叫做完成左
2. 食麵包同魚仔: 老師俾左個假麵包同魚仔諵b, 佢自動波擺入口, 老師叫佢請mama食佢請baba食, 跟住又請mama食
3. 推車車: 老師叫佢將架車推俾baba, 佢自己係枱上面推, 跟住係都要拎起唔肯推俾baba, 試左幾次都唔成功
4. 問家長: 問下我地平時放假會同諵b去邊, 我地都係答去公園、郊區, 試過去圖書館但諵b唔識, 老師就話佢仲細, 俾佢感受下都好
5. 最後送汽球: 諵b見到老師有好多汽球, 係咁指住要, 老師俾佢自己拎一個, 佢好開心仲好似想拎晒走咁
呢間12月先知結果, 感覺真係唔錯
睇得出老師有愛心, 面試時會順住小朋友反應去調整
如果收我都想俾諵b讀
有學券學校
呢間原本係我好心儀的學校, 有學券又有外籍老師
但而家已經變左我地感覺最差的一間
先講佢申請過程
佢係咁多間唯一一間報名都要交健康報告表的學校
(聽講其他都係收左入學前先交)
我申請時無交, mama我又懶懶閒一直唔為意面試要補番
結果到呢日朝早醒起拿拿聲周圍搵醫生
(健康報告表要搵註冊西醫填)
好多醫生都full booking
最後都搵到, 除左填一填就無左$180之外
最重要係令諵b無左午睡時間, 直接影響佢interview表現
去到開頭感覺都幾好
門口係外籍老師迎接
(題外話: 佢地的外籍老師似係菲籍, 我唔係種族歧視, 只係同想像有d出入^^")
先入去填問卷同小朋友玩玩具等
學校唔算新但環境幾大
跟住老師黎帶我地入課室interview
1. 入圖形: 老師先示範再俾諵b做, 諵b係老師同我協助下成功做到
2. 疊杯杯: 又係老師先示範, 諵b唔係做啱晒但做到8、9成
3. 推車車+認生果: 老師用個籃裝住呢幾樣野, 原本想考諵b推車先, 但諵b見到d生果就唔理架車, 係都要要個生果, 老師又係都要佢推車, 來回搞左一陣最終都係俾生果佢, 諵b拎左生果就唔肯放手, 老師想要番再叫佢推車, 佢就發忟憎拒絕, 最終成功拎番但已經令諵b唔太高興, 係都想拎番生果, 不停say no唔做其他野
4. 老師見無咩用就送樽糖仔俾佢, 佢完全無興趣, 呢個時候隔離面試的小朋友跌左d野落地, 諵b八卦擰去望, 望到實老師叫佢都無反應, 老師係咁拍佢都唔擰番轉頭, 我知佢係特登既, 因為佢唔鍾意個老師, 最後當然無bye bye同謝謝
一出課室我已經好唔開心, 一黎諵b失控, 二黎個老師令我感覺好唔好
跟住再去另一個課室考大肌肉運動
要疊大型lego, 爬隧道呢d
諵b完全唔肯爬隧道, 只係俾大型lego吸引住
呢個老師又係令我感覺唔太良好
到後來已經係完全唔望諵b, 好似唔想理佢咁
呢間學校係即時知收唔收同要交留位費
最後收左諵b讀下午班, 再排全日班, 交左$970
果刻我1516唔知交唔交好, 老公話交左先
結果呢個周末我越諗越後悔
轉全日班機會唔大, d老師感覺又唔好
面試時只係想諵b做到佢地想佢做既野, 做唔到又唔會鼓勵小朋友
唔似其他學校咁會順住小朋友的反應, 好工式化
同埋主觀感覺唔到老師好有愛心
我同另外一d mama事後傾, 大家都有呢個感覺
仲要佢好似係人都收咁, 真係好失望
好似嘥左成千蚊
見完呢2個星期
感覺都幾攰
我諗黎緊報左但唔係好心儀的學校未必去面試喇
已經有1個半offer係手
可以等真正心儀學校面試的機會
應該最快都要12月尾先有
