諵b一歲 - 寫真集

諵b一歲大日子

諗過俾幾千蚊去影cake smash相

後來因為會搞生日會

又join到呢間可以免費影相

所以唔再另外俾錢影喇~

 

呢間studio係荃灣近近地

每個月每日有一個quota可以免費影相

只要鬥快係佢個活動post留言就得

佢地方好大

全部實景真props

真係無咩studio會咁落本呢 

 

 

 

 

 

 

諵b爸爸臨時要返工

造就左呢次二人世界一歲生日相

"MY FIRST BIRTHDAY"

 

 

 

有得爬開心好多 

 

巨型props係幾靚

 

諵b當日唔太enjoy架

無咩笑容

又有少少忟憎

 

 

個人偏好白色背景

 

 

 

呢張係最多笑容喇

 

最後我加左$360要晒soft copies留念

平平地玩下都唔錯

不過要有心理準備攝影師唔太會氹bb

studio亦唔係專門影bb, 例如無舖地毯o個d

同其他專幫bb影相的地方好唔同

建議等bb大左先去影或者2公婆去影會開心d~~

幼兒班試堂日

踏入9月係各幼兒班報名高峰期
我諗住幫諵b報pn班
之前不停寄報名表
踏入11月就要開始面試高峰期喇

題外話:
我想諵b可以讀全日班
但全日班競爭異常激烈
諵b得14個月真係咩都唔識
同年頭出世的bb爭半年以上
所以都係抱住輕鬆心態去體驗下
當然如果收到佢我會好開心啦 haha

講番幼兒園
每間學校的環境同師資真係好靠其他媽媽口碑
有d會安排參觀日等家長睇下
但親身試堂真係少之又少
知道屋企附近有間幼兒園有offer試堂
即刻報名去體驗下
呢間學校口碑唔錯
相信學校對老師同環境有信心先會安排試堂
另一個原因係佢之前有校舍租約問題
原校址俾另一個宗教團體買左打算開另一間幼稚園
而家已經物色左新校舍同裝修緊
但仲未可以報名, 會miss左報名高峰期
可能因為咁希望透過試堂等家長了解多d
將來開放番報名時都可以吸引到小朋友呀

今次試堂2個鐘
內容好豐富呀
去到先玩下玩具warm up

老師簡單brief完就去唱遊
唱遊完去做下小手工
係萬聖節糖果袋+2粒糖
跟住再玩集體遊戲
最後仲有午餐食
(呢樣真係好surprise, 我以為得茶點, 之前仲煩惱緊趕唔切煮lunch)
食完可以繼續留低係playground玩
諵b都玩左陣先返去

 

感想:
學校係open area, 有好有唔好
感覺開揚, 但如果全部上堂唔知會唔會較嘈
校長老師有愛心好nice
一黎到就有老師不停過黎陪諵b玩
感覺到真心喜歡小朋友唔係純粹打份工
試堂內容豐富, 似真係上左半日堂咁
有lunch食真係加分架!
真係有得食有得玩仲有得拎(小手工)

諵b表現唔錯, 一去到見到老師笑晒
又會hello, 走時又會bye bye飛吻
開頭玩玩具好專心
不過玩耐左開始失控
唔肯坐同掉玩具落地 (佢係屋企慣左地下玩)
阻止佢就唔滿意鬧人 (呢樣好頭痛, 唔知邊度學又唔知點教好佢)
唱遊時唔投入, 唔會望住老師
睇黎對音樂無咩興趣 (搞到我想報音樂playgroup培養下佢)
係咁想爬出去, 一定要有野拎係手先可以靜落黎
做手工ok, 肯掂d漿糊一齊做
集體遊戲都會參與, 玩彩虹傘仲好開心
食完全無問題, 肯自己食又添多碗
到去playground玩時又再失控
可能熟左環境, 有個哥哥同佢一齊入屋仔玩
大家都好鍾意開門關門
佢唔鍾意個哥哥阻住佢玩
大叫鬧人(真係好惡= =")

諵b細個俾人搶野係唔反抗好平靜
唔知點解變成而家一俾人拎走d野或者搶野就發惡鬧人
話佢仲會繼續搏咀
仲有佢對分享呢個觀念好弱
當務之急真係要教好佢
我諗佢係想表達自己好想要或唔好拎走佢
但表達方法令人覺得佢係鬧緊人, 語氣又粗魯
每次佢咁樣我都即時stop佢
話完佢又會講道理, 但好似無咩用

仲有佢坐唔定
睇黎要買張枱仔同櫈仔等佢習慣坐定定玩玩具

諵b一歲 - 830 bb生日會

話說同諵b同年同月同日出世的830 bb有個whatsapp group

呢個group人強馬壯, 人數不停加

到而家已經有36個mama喇!

可以搵到咁多同一日出世的朋友仔真係好開心

大家一齊大一齊玩

一歲大日子

當然要搞番個生日party

 

 

 

 

 

 

 

 

 

 

 

 

 

地點係mtr員工俱樂部

係荃灣好近我呢 hehe

果日有靚靚生日蛋糕

有每個小朋友名的cupcake

仲安排左攝影師幫每個bb影獨照, 每人10分鐘
諵b當時其實好眼瞓，狀態麻麻
成日發忟憎想走佬
最後成品唔多, 不過出黎效果唔錯呀!

 

 

 

 

 

 

 

 

 

 

 

 

 

下次再同咁多朋友仔玩過~~

 

 

 

 

 

Playgroup看性格

諵b踏入一歲, 係時候俾佢見下世面
出去上下playgroup喇!

話說回頭
諵b未出世之前
每逢朋友問起會唔會俾佢返pg
當時我都話未必會
唔想做怪獸家長
但原來當bb出世後
了解多左, 心態真係會改變

市面上pg五花八門
內容亦各有特色
有全英文、幼潛、純玩樂、音樂etc
真係唔知點入手
最理想係咩都試下
咁就搵到最適合bb的
不過我只係試左3間, 都睇到諵b有唔同反應
礙於時間同耐性所限
試到第3間覺得ok就揀左喇

(一) 全英文班
一開始唔知點揀
就諗不如揀英文班, 外籍老師教
諗住俾諵b接觸另一種語言
試完發現, 諵b連廣東話都未識講、聽又明唔晒
學多種語言簡直係嘥氣XD
上堂完全聽唔明, 唔知老師講咩
每星期先得一個鐘, 返屋企又唔會成日講英文
都係實際d搵番廣東話
下一步先諗英文

(二) 純玩樂 / kid gym
呢樣唔會考慮喇
返pg都係想學到野為主

(三) 幼潛
呢種課程近期好hit
都有諗過上, 但近屋企果間評價麻麻
要搭車就違反左我上pg要近屋企的原則
所以再搵

(四) 音樂
呢種都有興趣架
不過唔係1st choice

跟住主力搵d上堂會唱歌、做手工、食茶點呢類
可以透過呢d活動學習指令, 同其他小朋友玩
呢種都試左2間

第一間:
1個老師+助手 : 6個小朋友
老師會同小朋友互動, 例如講下故事再同小朋友玩
但因為每次互動的對象都係一個小朋友
咁其餘5個就係望住老師同果個小朋友玩
每次都要等一輪先到諵b
等頭2-3個都ok, 跟住開始唔耐煩就會扭要出去同會叫
感覺呢種形式唔啱佢

第二間:
3個老師 : 6個小朋友
老師都會同小朋友互動, 但今次係其餘小朋友都要一齊做動作同玩
呢個形式好d, 諵b唔使等, 有野做佢唔會唔耐煩
同埋呢間的老師吸引到佢望住
所以最後揀左呢間

試完幾堂
發現諵b最弱係坐唔定
我以為佢算係幾乖, 原來都唔係
例如其他小朋友會乖乖坐定睇住老師
佢係都要爬出去搵玩具玩
手上面唔可以無野拎住
坐得耐就想逃走
好多指令都未識
食茶點/做手工要坐定定: 佢會想走, 除非見到d茶點
手唔可以放台面
想玩玩具唔可以爬出去, 要舉手要
呢d真係未教過佢
見到其他小朋友會好乖咁配合我就有少少唔開心
同埋發現同班大4個月已經好唔同
大半年果d真係相差好遠
一諗起n班interview要一齊in就覺得無可能有得比

近來諵b開始曳
坐唔定
係地鐵會大叫
話佢會唔高興搏咀 (好明顯架, 真係回應緊你話佢)
唔高興又會忟憎全身用力
有時都會失落同擔心
唔知去面試會點失控
不過諗番轉頭
自己係咪過份緊張呢?
教導小朋友要慢慢黎
諵b唔識都好正常
點解要因為擔心面試而唔開心
咁我咪真係變左怪獸家長?!
而家我都成日提自己要放鬆d
小朋友自有佢的性格
家長的角色係因應小朋友的特質去教
在旁循循善誘
而唔係人地係點我個小朋友就要點
真係要時刻提醒自己!

最後送上諵b第一張勞作
雖然係我捉住佢隻手幫佢完成
不過都好有紀念價值呀!

諵b一歲 - 成長與發展

拖左一個月, 終於捨得寫喇...

重: 9.535 kg
高: 76 cm
先講左呢樣...係諵b一歲我收到最開心的生日禮物
話說諵b出世係超細粒b, 連姑娘都叫佢細細粒
啱啱過5磅唔使瞓箱
係過去一年, 佢由最尾條生長線
一直向上爬: 3, 10, 25
黎到1歲, 佢終於升到50再高小小
係中碼b喇, 我真係好開心, 佢唔再係細細粒喇
另一樣安慰的
係一歲要打3針
第一針: 完全無反應, 姑娘讚佢好叻仔
第二針: 喊左一聲食粒星星餅無事, 姑娘又讚佢叻叻
第三針: 喊左兩聲無事, 姑娘再讚佢真係好叻仔
做媽媽的聽到自己個仔俾人讚, 真係好欣慰, 出黎獎佢任食星星餅XD

發展(健康院會問):
識發咩音: mama, baba, mum mum, yaya, 試過撞口神會跟人口水尾講(街街, 乞嚏, bye bye)
會玩咩玩具: 公仔, 睇書, 積木, 推車(要識推)
識唔識行: 扶住野行 (要行到一張枱的距離)
俾餅仔佢睇下手指靈唔靈活
聽+睇有無問題
姑娘話18個月返去要識指眼耳口鼻, 識得自己行

近來最愛: 推學行車、推櫈
 

係咁捉人手要人扶佢行

 

未企得穩就學人踢波XD

另一最愛: 爬梳化

呢個月諵b不停拋玩具落地
用一包包紙巾疊積木時會推散然後好開心
自從識得拍手同thump up, 半睡狀態都會做
我發現小朋友識得一個新動作就唔做舊既
隔一排又轉亦一套動作
識推車自己行
會走埋黎捉大人對手帶佢行去想去的地方
知道廁房同廁所唔入得
會坐係門口叫人想人帶佢入去
想做一樣野做唔到會大叫mama求救

 

 

 

 

 

 

 

 

 

想要果樣野得唔到會發脾氣
姑娘教唔好理佢
因為佢而家知道扭計會得逞就會不停扭

 

 

進食模式:
3奶2固
開始自己早餐食少左奶, 因為知道有包包食
平時11點半會瞓住食奶, 而家開始自己戒到淨係食3安
姑娘話戒飲睡前餐奶, 最易蛀牙, 同埋要刷牙仔
仲話可以試飲牛奶, 試過一次飲2啖唔要

自從轉左illuma, 便便好似真係好d
雖然都係2-3日一次, 但起碼唔硬
唔使去到出血同好用力都去唔到要大人幫
咁樣我已經好滿意喇
不過講真真係幾重皮...

 

 

感想:

諵b一歲大日子, 感觸的心情持續左一個月
回想番佢出世的日子
真係唔敢相信已經過左一年
如果問我湊小朋友辛唔辛苦
我會話我覺得完全唔辛苦
當初坐月、餵夜奶捱眼瞓的日子我完全唔記得
只係記得每日見到佢有幾開心
雖然係有犧牲
但呢d犧牲將來可以做番
但有左佢的開心係其他野代替唔到

好想將佢每一秒的樣子、笑容、發展都記係腦裡面
奈何我的記憶有限
你問我佢5個月、7個月或者9個月時係點
我都有d模糊
有時我會好可惜唔可以記得佢的所有
但更令我明白活在當下的重要
可以陪住小朋友的日子唔多
或者佢肯俾你陪的日子都唔多

諵b爸爸好簡單咁剪左段佢的成長片段
時間所限連字都加唔到, 但我睇時已經感動到淚流滿面
諵b, 請你慢慢地快高長大就好!
We love u so so much!