快快手寫埋11個月記錄
好快就到一歲大日子喇!
個個月都要講一次: 時間過得太快
諵b 11個月
小朋友成型喇
曳仔樣出晒黎
越黎越爛玩, 有得玩幾眼瞓都係假
不過樂觀咁諗
男仔活潑無所謂啦, 曳好過呆呀
1歲都未夠的人仔, 我唔想規限太多
局限佢的發展及創意
但有時又好矛盾
驚太放縱佢將來唔守規矩
究竟幾時先係教佢規矩的好時候
究竟點樣劃條線都係好大學問
食
繼續係諵b強項
有時我都唔明
佢明明3日無便便
個肚仔漲漲
大人都會無胃口
但佢係一d影響都無
繼續咩都放得入口
都好, 食得是福
好過要擔心佢唔肯食野
大人食飯佢一定要跟住食
望住d食物2眼發光
視綫從此移唔開XD
飲水每次一啖起兩啖止
飲湯就肯坐定定
便便
每次去都喊
仲要痾損左
見到都心痛
上個月諗住轉illuma 2
點知醫生話唔關奶粉事
決定等夠1歲直接轉illuma 3
大肌肉發展
扶住野企同行都無問題
不過只可以放手自己企2秒
行一陣就要爬
爬得好快, 識爬上地台的2級
抹地能手XD
今個月學識左好多動作
無!
黎啦! (怪手XD)
11個月正日時仲突然學識拍手
跟住再thumb up
果下勁開心同驚喜 haha
小肌肉發展
呢方面發展唔錯
識用手指拎零食放入口
不過如果粒零食係手掌
佢識拍埋個口但次次都食唔中跌落地
玩圈圈都係拎出黎
最鍾意直接拎最底的藍色
好似好留心睇書, 仲會口up up
識睇書一定係咁睇XD
同好多小朋友一樣, 最鍾意拉紙巾同撕紙巾
一入房見到呢個畫面
仲要對住你笑得好開心
真係好好笑!
講野
媽媽
爸爸 (呢個月叫少左)
乞嚏 (有一次佢舅父打左個乞嚏, 全家都聽到佢講係我聽唔到...)
BYE BYE (今次我聽到喇!)
其他發展
識得同人玩喇! 話"追你", 佢真係會扮俾你追想走咁, 好搞笑架!
摷櫃桶
將玩具放落地再執番再放再執, 不停重覆
問佢"奶咀呢?", 識得爬去搵, 再放啱方向擺入口
識得揮手BYE BYE / HELLO
食野會嗡面單眼, 好似話俾你知好開心咁
第一次同狗狗玩, 開頭驚驚地
好快warm up左就同狗狗鬥快爬
仲扯佢D毛XD
你天真的笑容是媽媽心中最好的解愁良藥
媽媽同爸爸最鍾意係每晚臨瞓前望住隻熟睡的豬仔
兩個人會忍唔住話不停話好鍾意佢同錫佢
既肉麻又窩心
湊世界盃熱
推西瓜無難度
識得望鏡頭自拍
諵b11個月快樂!!
倒數一歲大日子
原本1516搞唔搞生日會
老公話一歲咁重要堅持要搞
搵朋友幫手book會所
叫到會
淘寶淘佈置用品
訂蛋糕 cupcakes cookies
曬BB相
雖然諵b未必知發生咩事
希望佢大個睇番知道自己有一個難忘的一歲生日會啦!
其實心底裡...
好唔想佢咁快大個
好唔想佢咁快一歲
好唔想佢唔再BB
不過見住佢繼續精靈快樂
應該要感恩同開心~~
