Yan。Nam B。Blog: 2013

2013年12月26日星期四

諵b第一個聖誕節

聖誕節係我最喜愛的節日

普天同慶的氣氛真係好開心架！

為左令諵b都感受到聖誕氣氛，我地特登帶佢去影下聖誕佈置，不過唔去得遠，只係喺屋企附近商場影下

呢張諵b個樣好醒目^_^

街買的聖誕帽多數好大頂，平平地買到呢頂bb聖誕帽，size啱啱好，大啲都帶唔落

帶左聖誕帽即刻有氣氛好多

無特別買聖誕連身衫俾諵b

怕過左聖誕節未必再著嘥左，平平地買件衫仔應下節

係聖誕鹿黎架，紅鼻哥係立體，好可愛！(from next, 近期最愛)

最後送張彩色聖誕樹俾大家，祝大家有個快樂聖誕！

Merry Christmas & Happy New Year

2013年12月8日星期日

諵b百日宴 7 Dec 2013

呢日特登俾bb瞓多啲

希望佢無咁攰唔會扭計

原本預6點到酒樓

結果諵B臨出門口先便便

開心死我，佢4日無去喇

一黎去唔到個人會忟心情無咁好

二黎佢啲便便出名臭，喺酒樓去真係唔知點好

所以我呢日不停同諵B講快啲便便

最終都趕得切，叻仔！

7點到酒樓就不停影相

呢個B係屋企好開心架

去到酒樓環境陌生就變左呆豬

平時影相識望實鏡頭

呢晚影相就擰左擰右硬係唔望前面

個樣好似好攰好唔情願咁

點都唔肯笑，同屋企兩個樣

影到咁上下切埋蛋糕就扭眼瞓

跟住瞓到好淋，點整都唔醒

抱佢起身逐圍影相醒左一陣

但仍然呆豬，呆一陣又瞓番

臨散席親戚抱黎抱去轉手又醒一醒

繼續呆豬

係個樣好唔滿意咁XD

不過咁多人抱黎抱去又錫又摸佢都無扭計無喊

我覺得佢已經好乖好叻仔

老公返到屋企都好心痛諵B俾人舞黎舞去

不過我一早預左

擺得百日宴就係咁

只要bb唔喊都ok ge

如果問我會唔會再搞

我都係覺得唔搞好啲

辛苦bb又辛苦大人

嗰晚返去都好攰

不過都好開心

好感恩好多人錫諵B

佢收到好多禮物同利是

開心死佢喇！

睇番朝早係屋企個樣

簡直係另一個bb

諵B希望你快高長大

做個開心baby

爹爹媽媽錫晒你！

2013年12月7日星期六

諵b 百日宴 - 準備

諵B出世時已經決定唔擺滿月擺百日宴

始終滿月BB太細

自己又啱啱坐完月未復元

百日宴BB大D精靈D

到BB出世後

我開始唔想擺, 話就話100日, 其實BB仲係好細

要佢咁長時間應酬親戚朋友會好攰

加埋BB出世後樣樣都係錢

擺百日宴滿足大人多過BB, 想留番D錢俾BB用仲好

但老公堅持要擺, 話呢D係開心事

同埋係第一個孫, 要重視D

一直拖, 拖到個半月前突然醒覺BB 100日係星期六

年尾又多飲宴, 應該好難搵地方, 拿拿聲周圍打電話

諗過屋企附近但唔方便, 決定target旺區

諗過九龍塘八月花, 美心集團有保證

睇菜單唔貴, 想落訂時先話有min charge, out budget打消念頭

轉搵稻香集團質素都ok

記得朋友話雅蘭中心的迎囍食物唔錯, 位置又好方便

抱住無位心態試下打去問

點知仲有位,可以間房同有西式backdrop

個場唔錯, 價錢亦好實惠, 即刻落訂, 最後book左6圍

環境真係唔錯, 擺6圍啱啱好唔太迫

又可以間房, 係影相時要疊高枱先夠位

想搞得好睇d, 但又唔想嘥太多錢

所以無搵佈置公司, 無candy corner

只係訂造banner同訂氣球用黎影相

未收到朋友的相，手機影到好暗

(氣球好嘥呀, 唔拎得返屋企, 真係影完相就唔要, 好唔捨得)

訂左個得意立體蛋糕

蛋糕好睇又好食, 影相好靚, 唔捨得切

最後決定準備埋小禮物

淘寶買的盒質素好好, 好得意

名牌貼紙反而好淺色, 有d失望

當晚無準備任何播片或節目

只係影相食飯, 等親戚朋友見下BB

環境、服務、食物質素都ok

如果budget唔多，迎囍真係幾唔錯的選擇!

轉眼間諵B 100日大喇!
時間真係飛快咁過, 而家越黎越多反應
唔再係初生咁悶喇, 越黎越好玩

寶寶的咕咕聲與咯咯聲可能越來越強，但現在他只是能發出一些子音，結結巴巴發出 p 與 b 及 m 與 l 的聲音，這就是第一個「媽媽」(ma ma) 與「大大」(da da) 音的由來。首先，她並沒有將這些音與任何特殊的意義聯想在一起 (雖然妳會這麼想)，其實那只是她最容易發出的音。(有趣的事實：「媽媽」與「大大」及其變化的音在各種語言當中都是常見的第一個字呢。)但妳對於她的這些字的回應可鼓勵她重複這些字。
現在，寶寶也知道如何利用他的聲音來引起妳的注意，持續和寶寶對話是最重要的。當她伊伊呀呀發出一串聲音時，請模仿這些聲音回應她。在跟她說話時叫她的名字，也可唱歌給她聽。當爸爸媽媽輕輕唱歌給寶寶聽時，寶寶都很喜歡同時被親熱地撫抱呢。

食
由2個月到而家都係食緊5安
每日3餐媽媽奶, 2-3餐奶粉
以前食得好快會一口氣食晒
而家開始心野, 到最尾1-2安就開始郁黎郁去
要慢慢氹佢食, 但好彩都肯食晒

因為扭計試過俾珍珠末
用針筒餵佢喊到拆天
好心痛但又要迫佢食
又因為4日無便便俾開奶茶佢飲
飲過一次未知有無效

瞓
都算幾瞓得, 但瞓唔長
夜晚最多瞓6個鐘
所以要較到12:30食最後一餐奶
咁朝早可以6:30左右先起身
不過有時都未必得, 5點就扭食奶

反應
呢個小BB而家越黎越精靈
最鍾意係每朝起身爸爸媽媽同佢講good morning
一聽到就笑到好燦爛

好鍾意人地同佢傾計
一傾就唔肯停
仲會叫到好大聲好長氣

有時我地好攰唔理佢
佢就不停叫叫到我地理佢為止
一問佢: 咩事呀, 佢就送上一個開心笑容
即時幾攰都唔捨得繼續瞓
即刻起身陪佢玩

而家開始唔鍾意打橫抱
打橫抱會投訴
打直抱即刻開心晒
八八卦卦四圍望

好鍾意係屋企
屋企的佢最活潑最多笑容
一出街就好緊張, 個樣呆晒

仲識得投訴同扭眼瞓
要人陪佢或者氹佢瞓

不過咁耐以黎我都話呢個bb真係好乖
唔會點喊點扭計
無咩要我地擔心的地方
真係一個好抵錫的baby

BB真係每日都俾到好多驚喜俾你
望住佢時間過得特別快
而家每日返工都望收工
最期待周末可以全日痴住BB
我真係好想做full time mother陪住佢
不過可能當做ftm時, 我又會覺得好悶:p

同所有媽媽一樣
我覺得自己的bb真係好得意呀!
nam b, love you so so much!!