Honeymoon~~

結婚前一直話要去歐洲度蜜月
一世人一次, 梗係想衝出亞洲
另一半就好想去日本, 希望可以喪shopping
佢又好怕搭長途機, 所以唔想去歐洲
為左呢個問題, 我地一直下唔定主意去邊
再加上歐洲使費好重, 唔知擺完酒後負唔負擔得黎
後來又諗過Maldives, 因為做promotion好抵, 去埋新加坡都係5萬, 5萬唔係小數目, 但以Maldives黎講真係抵
不過都因為怕結完婚後的財政狀況唔肯定而擱置左(而家泵心啦><)

honeymoon的事就一直擱置.......
最終結完婚都唔能夠即時去honeymoon
講真會有少少遺憾, 但結完婚真係有好多手尾(還衫、三朝回門), 加上我地又擺2日, 唔去旅行係屋企抖下都好~

咁究竟幾時去honeymoon好呢?
最後決定係我生日+拍拖周年紀念日呢段時間去, 即係10月尾至11月頭(自己決定...haha)

地點最終屈服左
歐洲已經到冬天, 好早天黑, 酒店同行程plan唔切
Maldives 11月開始踏入旺季, 貴得驚人
其他地方無興趣
最終去左另一伴最想去的日本
決定一世人豪一次去足14日, 可以揀2個地方, 結果就係我想去的北海道同佢想去的大阪喇

睇左幾間大旅行社, 原本諗住搵東瀛遊買package, 價錢都幾抵
後來朋友介紹autoholiday(自遊企劃)
價錢平d之餘, 仲可以問埋agent行程好唔好, so far感覺都好唔錯, 比大旅行社flexible同helpful好多

雖然11月係北海道係睇吾到任何一種四季特色, 無櫻花、無花田、無紅葉、無雪景
但最緊要係我地2個開心嘛~
唯有寄望大阪睇到好葉啦!!

Vendor review - 姊妹裙

商戶: MDL Beauty 
地址: 鑽石山新蒲岡大有街29號宏基中心705室
電話: 9513 3032 / 9424 0007 

Comment:
90分

姊妹裙可說是其中一個困擾項目, 要約齊所有姊妹的試身及取裙是一大難題, 因此上去MDL的次數與試婚紗禮服不相伯仲
雖然可以讓姊妹自行上去, 但如果時間可以, 我覺得親身陪他們會較好

找到MDL的過程很有緣份, 當時仍未確定到哪裡造姊妹裙, 一直屬意深水埗的布藝坊, 但可能生意好, 網上越來越多bad comment
後來原來老公的朋友親戚開的姊妹裙店就是MDL, 不怎樣考慮便決定找他們幫忙

如果不認識他們, 我也會明白為什麼網上會有對他們有那些評價
但因為認識他們, 我會體諒, 再加上他們對我的態度可能會較好...haha

MDL的姊妹裙質素很好, 看上去及摸上手跟某些便宜舖頭有很明顯差別, 款式有大路款亦有不少tailor-made款, 選擇很多
我最初選了淺黃色, 後來越想怕顏色太深, 第二次與姊妹度身時發現一款很淡的黃色, 二話不說立即決定它
它是底布黃色, 面的雪紡用香檳色, 透出很淡的黃色, 很漂亮
伴娘裙以為是淡綠色, 造起後在燈光下看清楚原來是靠近tiffany blue, 顏色較特別

姊妹裙如期造起, 可能單太多漏了通知, 不過問題不大, 只要造起便ok了~
全部姊妹裙都合身, 一條也不用改, 不像外面很多舖頭只是由S、M、L碼再改裙, 而真的是度身訂造
只有伴娘裙要改窄, 可能是她瘦了及想穿fit身一點, 只是小問題
最重要沒有出現我最擔心的錯色錯款!!
出來的效果很滿意, 因為顏色及款式跟當初選擇時完全沒有分別, 真的很感恩~

缺點可能是位置不及尖沙咀、旺角方便
其實新蒲崗在鑽石山旁邊, 對我來說可以接受

價錢屬中等, 始終質料有保證, 如果與其他JM夾, 人多可以有多點折扣呀~

底布是鮮黃色, 面是香檳色, 跟伴娘裙拼在一起顏色很柔和~~

Vendor review - 花球

商戶: 秋子花藝
地址: 旺角砵蘭街366號家興樓一樓
電話: 2380 8927

COMMENT:
90分

每次上去秋子都好多人, 湯生亦好忙, 一腳踢咁招呼所有新人
因為佢咁忙, 好多時都好難同佢仔細咁傾個花球, 傾左2句佢就會話我幫你襯啦, 跟住又去招呼其他人
結婚前一個禮拜的星期六上去confirm款時, 已經有5-6 pair新人係度, 難怪湯生無時間聽電話
等佢聽完我地的要求mark低後, 就將花球張sample相攝左係電話底, 叫我地星期一打俾佢, 提佢放番入個file度
其實我仲想講得再仔細d, 例如用咩花咩顏色好, 但實在太多人喇
結果因為唔太放心, 過2日直接再上去講一次
好想用最愛的繡球, 但驚好快殘, 最後決定用titanic加牛奶色玫瑰、粉紅風信子加粉紅桔梗, 後來係秋子度見到夢幻紫桔梗, 決定轉軚
結婚當日見到個花球時嘩左一聲, 好新鮮好靚

搵花球時最初鍾情於miracle flower, 鍾意佢地的花襯得好靚, 每個花球都有特色, 可惜價錢太貴, 同埋地點對我唔方便, 只能夠卻步
後來考慮過trinice flower同卉豐, 最後都係揀左秋子

唯一令我對秋子唔放心, 始終擔心只用我的口講, 襯出黎的花球唔知好唔好睇, 所以穩陣起見都係決定俾定張相湯生跟住改成心目中的款式。而家諗番, 其實大家絕對可以放心俾湯生襯花, 佢襯出黎的效果好柔和, 顏色配搭都好好

價錢同質素相比, 秋子絕對物超所值!
$980包一個花球、2個新郎襟花、16個兄弟姊妹手花 或 7個蕙蘭襟花、一袋頭花, 好抵~
花球好新鮮好大個, 用左2日只係有少少花燶左, 影相一d都唔覺 
因為花球要用2日, 決定兄弟結婚果日朝早先去拎, 我早一日去拎頭花
點知d頭花返到屋企已經殘左...果時有d失望, 仲諗緊第2日要抽時間去買
點知結婚o個朝兄弟拎花球時湯生再俾多袋頭花佢(可能唔記得我拎左)
簡直喜出望外呀, 仲有我最愛的粉紅繡球花, 用黎中午外影做頭花, 賺左...haha

襯出黎的顏色好柔和, 感覺好日式


風信子好香呀! 右下角就夢幻紫桔梗, 湯生幫我再配左d深紫色桔梗中和色調

新郎襟花好新鮮

主人家蕙蘭襟花擺左1日都無分別


最愛的繡球花

Vendor review - 裙褂

商戶: 永隆繡莊
地址: 九龍油麻地上海街409號地鋪
電話: 2780 3007

COMMENT:
100分
服務同質素都好好

一直覺得潮褂好靚好colourful, 不過cocoon的潮褂太貴喇, over and over budget

最重要結婚一生人一次, 可以跟傳統的就盡量跟, 所以一開始已決定穿傳統褂

傳統褂可以揀的唔多, 只係睇左錦發同永隆繡莊

由朗豪坊出發會先經過錦發, 第一次穿褂好得意, 款式都唔錯, 不過感覺較cher, 好想你即時落單
 
再行前一個街口就會見到永隆, 好彩入去唔多人, 等一陣可以慢慢試, 穿上身後即時覺得新淨好多, 繡花圖案亦立體好多

最重要老闆娘好好人, 任試唔嬲, keep住笑笑口, 試得好開心架~

最後揀左一件叫金龍彩鳳的大五福, 佢係老闆娘為左親戚結婚特別造的, 所以與別不同, 除左金銀線外, 仲有好多彩色線, 好colourful好靚,  唔似其他咁多金色好老, 又唔會只得銀色咁齋

件褂我係第二個著, 所以好新淨, 不過有d大件, 要改窄腰位同加膊, 開頭都擔心太鬆, 好彩出黎效果好好

最搞笑係記得試褂時, 老闆娘同另一個阿姐講: 佢(即係我)鍾意呢件靚野呀

到結婚前一日去拎褂時, 試上身size啱呀, 但點解好似唔同左既, 相隔幾個月唔通我唔記得左?!

問一問阿姐, 佢話唔會俾第二件你架喎, 再對一對張單, 原來搞錯左

拎番啱果件出黎, 我一望到即刻認得佢, 阿姐又話: 原來你租左呢件靚野, 真係好靚呀, 記住幫我地小心d呀

到老公去還衫時, 阿姐一見到件褂再話: 呢件靚野呀...哈哈

每次望住件褂都好鍾意, 好開心租到佢, 因為真係特別靚