Mini Home (4)

一開始鋪磚的進度好好呀, 好快鋪好左廁所廚房牆身

不過後來師傅趕住做另一單先, 所以放低左我地間屋, 停左工差唔多一個星期

不過我聽過好多人都係咁, 師傅同時有幾單工程係手, 呢種情況好普遍

我覺得唔係太過份都ok呀

 

未鋪好磚, 我地就訂左大門先, 造門要3個星期

為左節省金錢, 我地只係訂睡房門、廁所門及大門

廚房同書房只需要造門框

 

訂門呢樣野好困擾我地, 因為原來造門係好貴架!!

仲有門框門線加埋, 分分鐘貴過一道門!!

呢樣budget比我地預期的高好多(其實係我地低估左佢= =)

質素好的舖頭, 款式好靚, 但價錢唔平

我同男朋友都諗, 門唔使用咁貴啦, 所以周圍下有無平d的門

後尾搵到一間好似好平喎, 但係師傅話…一分錢一分貨…

我都明, 但樣樣都好d, 每樣貴少少, 加埋就好多喇

 

後尾我地都係去左一間價錢同款式都ok的舖頭

師傅仲幫我地諗下點慳錢

最後決定大門舊門框唔拆, 只係換門線

因為舊門框係實木, 質素仲ok, 反而大門就keep唔到

師傅係舖頭買左同色木皮, 幫我地貼上舊門框度, 咁就可以改頭換面

既慳錢又美觀, 最後價錢比我地想像中平左, 好開心~~

 

房門同廁所的候選款式有:

 

最後揀左:

 

大門款原來可以好貴, 2千幾蚊, 因為雕花手工多, 好靚呀~

 

但我地有鐵閘, 成道門遮住左, 唔需要太花巧

為左慳錢, 我地揀左平d的款再加錢轉實心門, 可以平一倍

最後揀左呢款簡簡單單:

 

顏色: 無錯, 係近期大熱的薰衣草色

開頭都驚會好快out, 但其他色又睇唔上眼, 所以唔理喇~~

 

門框門線都有得揀~

************************************

過左一個星期, 師傅鋪埋廚房、廁所地磚喇, 連我最期待的廳房地磚都7788

************************************

我地都去埋舅父度訂晒全屋傢私, 用左4個幾鐘, 不斷諗款同顏色, 過程好痛苦

不過定好晒又真係好開心既~~

************************************

黎緊好忙…要訂廚櫃同廁所櫃, 仲有浴屏、水龍頭等用品, 電器都係時候買喇!!

免費wedding logo

無意中係其他blog友度睇到, blog友yuyu好有心

免費幫有需要的新娘子設計logo, 佢的設計好靚架, 有專業水準~~

大家如果有需要記住搵yuyu幫手喇

裙褂 - 永隆繡莊(private)

其實好想去冠南華租褂, 舊同事講過

因為冠南華老闆認得佢, 所以會有折頭, 佢可以帶我去租

但折左都好貴, 始終佢本身價錢唔平嘛

試過同男朋友經過入去睇, 我地鍾情大五福或褂后(佢地話係同一樣)

呢d金銀線咁多的款, 價錢真係好貴, 即使租左好多手既都唔平

所以唔打算試喇, 驚破財, 哈哈

********************************

target去錦發同永隆, 心裡面prefer永隆多d

第一次係同媽咪爸爸去開砵蘭街買磚, 就去睇下環境

事隔個幾禮拜, 今次同男朋友媽咪一齊去

由朗豪坊行過去先到錦發, 由一個應該係老闆娘的人serve

佢拎左一件多金, 一件多銀的俾我試, 原來銀多d係精神d同無咁娘

價錢都幾平喎, 可惜心裡面鍾情永隆, 同埋男朋友未到

最重要唔想係錦發租係老闆娘的態度好cher, 唔舒服

連男朋友媽咪都唔鍾意

所以好快走左去永隆喇

********************************

永隆好多人呀, 老闆娘同另一個姐姐唔係好得閒理我地

不過態度仍然好好

主力試大五福, 永隆主要係分金龍彩鳳同金龍金鳳2款

(一) 金龍彩鳳

呢件幾鍾意呀, fit身d, 但好似舊左d, 感覺仲爭左少少

男朋友媽咪都覺得d金銀線唔夠出

(二) 金龍金鳳

呢件好多金, 娘左少少....唔得

(三) 彩色中五福

 

老闆娘見我地揀唔到, 話拎呢件靚野出黎

雖然佢係中五福, 但金銀線特別多, 手工好靚, 所以亦特別貴

可惜我始終鍾情大五福

(四) 金龍彩鳳彩色版?!

老闆娘一拎呢件出黎, 我已經想"嘩"一聲

係你喇係你喇, 大五福, 多銀色, 佢的色好靚, 特別彩色

最重要係原來呢件褂, 係老闆娘的姨仔出嫁時做的頭褂

我係第二手, 所以好新淨, 不過價錢亦貴d, 比起其他大五福貴幾百元

我已經好心動, 不過唯一美中不足係佢有d大件

老闆娘話褂大件少少其實好正常, 佢可以幫我修腰

又加個薄墊long起件衫, 加左真係ok喎~

諗左一陣, 決定租啦!!

因為真係有"就係呢件"的感覺, 希望修完腰fit身d啦~

唔止金同銀色, 真係好彩色

 

加映一張搞笑相, 老闆娘真係好人, 我男朋友唔租都俾我地著黎玩

似唔似呆佬拜壽呢

Mini Home(3) - 我們的磚

同大家分享下我地的心血

對其他人黎講可能無咩特別, 但我地真係好鍾意

仲記得揀晒磚果晚, 我開心到瞓唔著

因為終於決定晒, 放下心頭大石

不過到去買磚俾錢果下, 又好肉痛

因為媽咪不斷話你屋企咁細, 用靚D貴少少都唔怕啦

結果最後買的磚都比原定的靚, 價錢自然高D

好驚用得太多錢

但另一個角度睇, 俾多少少錢, 可以由大陸磚變左做入口磚, 都值得既~

*******************************

(一) 廳房地磚

牌子: Emil

產地: made in Italy

size: 6" x 36"

 

磚底印左牌子 

 

木紋好真呀, 係櫸木色

牆腳線由磚一開二整成, 因為磨滑左, 有條白邊, 男朋友唔太鍾意

*******************************

 

(二) 廚房磚

 

同廳房地磚同一間舖買, 一開始我地都決定只分2間舖買磚

因為想慳d運費

結果就係呢間專賣入口磚的舖頭買埋廚房牆同地磚

價錢貴少少, 但質素好ok

 

牆磚

牌子: Saloni

產地: made in Spain

size: forget...

廚房牆磚, 原來都要買好多箱

 

 

啞面, 有光下暗格仔先睇得清楚, 低調得黎又有d野睇

 

廚房地磚

牌子: Candia

產地: made in Italy

size: 12" x 12"

 

廚房地磚

媽咪話要買深色, 最後揀左mocha色, 有少少雲石紋

 

   *******************************

 

(三) 廁所磚

 

其實原本廁所同廚房磚都打算買大陸牌子

諗住揀中國十大名牌磚, 有質素保證

其中marco polo係旺角有專門店, 所以就去左睇

一睇d質素真係好好

款靚、硬淨、摸上去同其他平價大陸磚好唔同

店員話marco polo專出地磚/過底磚, 所以硬淨好多

但佢的價錢唔平, 後來發現可以媲美, 甚至貴過入口磚

係專間店睇完好滿意, 都想落訂

但我想望多幾間, 睇下會唔會搵到同款但平d既

始終廳房地磚已經用左好多錢, 想慳d

結果俾我係另一間發現同款同牌子的磚, 平左over 5蚊一件

雖然有驚過係冒牌或次貨, 但平咁多, 無理由揀平果間

好彩黎到d磚一樣咁硬淨, 無分別

 

廁所牆磚

牌子: 馬可波羅

產地: made in China

size: 12" x 24"

 

marco polo的e stone, 特別硬

灰色, 因為做牆身, 唔想咁"鞋", 所以揀左滑面

暗暗的石紋唔會好明顯, 但又唔會無野睇

 

廁所地磚

牌子: 馬可波羅

產地: made in China

size: 12" x 24"

 

深灰色, 有小凹凸紋, 加閃粉, 好靚

 

牆同地拼埋就係咁喇, 開頭好驚廁所會好暗, 鋪左上去都ok呀~

 

  *******************************

 

廁所效果

 

廚房效果

 

我同男朋友見到鋪左上去時, 都覺得靚到哇一聲

最重要佢地係我地的心血結晶, 係我地眼中特別靚

 

  *******************************

介紹埋我地買的掃口粉

 

廳房地磚 - 米黃色

 

廁所牆地磚 - 淺灰深灰

 

廚房牆可以用番白英泥, 地下原來都想買, 後來諗住用埋廁所地的掃口粉, 大家都咁深色, 可以慳d, haha

Mini Home(2) - 買磚記

呢個item簡直係磨人

全屋的磚都要換過, 而磚會影響全屋的觀感

萬一揀錯左, d色match得唔好, 形狀唔襯, 成間屋的感覺就會唔同晒

市面上磚的款式可以話多如天上繁星, 由顏色至形狀至款式, 千變萬化

對於有選擇困難症的我, 要揀啱心水的磚簡直係折磨

曾經考慮過上深圳買, 但有上去買磚的親屬話: 上去買會預多好多, 用淨好多

而家匯價貴, 再加埋運費, 我地屋企咁細, 唔會慳到咩錢

再加上人人叫我地地磚唔好用大陸牌子, 咁只係上深圳買廚房廁所磚, 好似好浪費時間

最終所有磚都係旺角砵蘭街買

日日上網睇資料, 真係獲益良多

************************************

(一) 木紋磚

最初諗住唔換地板, 慳番至少一萬蚊, 到後來都係決定換

最初揀無縫地板, 真係好靚呀, 又唔會好似木地板咁有罅同易花

但身邊的人力勸我地, 話好難打理, 抹地好辛苦, 同埋唔襟用

果時真係十五十六, 因為地磚的款式唔靚, 感覺好凍, 始終鍾意無縫地板

好彩, 後來發現左木紋磚的存在, 開始集中搵木紋磚

原來木紋磚都有好多學問

顏色方面, 由好淺到好深都有

我同男朋友鍾意淺色地板, 所以集中睇淺木色

開頭我想揀淺到白色咁的色, 但男朋友鍾意偏黃色(後來買果款係櫸木色)

我睇睇下都覺得, 太淺色木紋唔出, 唔似木紋磚, 感覺亦無偏黃色咁warm

形狀方面, 有方型同長條型

呢樣無異議, 一定係長條型, 咁先似木地板

size方面, 木紋磚的長同闊都有好多選擇

因為長型磚一定有d彎, 越短同越闊的磚, 彎度會無咁明顯

但太短同太闊的, 又唔係木地板, 所以要取個平衡

網上有專家話, 20cm x 100cm係兩方面中最平衡的一種size, 大家可以參考下~

我個人覺得6" x 36"(15cm x 90cm)係最好睇最似木板

但呢個size由於偏長同窄, 所以彎的機會較高

由於屋企細, 唔適合用太闊的磚, 再加上貪靚, 我都係買左呢隻size

不過就揀左意大利磚, 希望無咁彎~ 

(二) 拋光磚 / 啞面磚

廚房同廁所要諗拋光定啞面

拋光磚好似唔襯現代感的屋企

所以廁所一早諗定唔會拋光

而廚房就掙扎左好耐, 因為拋光感覺光猛d

又好似易抹d, 無咁易藏油污

但睇完又驚唔好睇

所以最後都係揀左啞面磚, 暗花

而廁所牆身就揀左石紋磚

(三) 掃口粉

以前屋企的磚罅, 都係用英泥填補

一係白色或深灰色

好處係耐用堅固, 但易發霉, 即係我地成日見到痴係磚邊黑色一點點

如果發霉或污糟左, 就好難清潔

後來上網刨資料時, 發現原來而家好多人用掃口粉(或叫填縫劑)封磚邊

掃口粉會無咁易發霉, 不過無英泥咁襟用, 易甩d

但最重要係掃口粉有好多色, 可以揀番同磚差唔多, 咁條邊線無咁明顯

有d人鍾意邊線出d, 咁用白英泥都無問題

我想廳房的木紋磚邊線似番磚的顏色, 男朋友又想廁所牆同地的邊線唔好咁明顯

所以就用掃口粉喇

網上好多人用意大利掃口粉, 反而整到磚面痴左d粉好難清潔

大陸的牌子好似問題無咁多

所以我都係買左大陸牌子~

下一次同大家介紹下我的磚, 我好鍾意佢地架

Mini Home (1)

新屋自從年十五之後, 就開始拆拆拆喇

睇下只係剷左牆, 未拆地板之前

其實個地板狀況OK架, 用左10年都無乜罅, 如果唔換, 可以慳番幾萬蚊

考慮左好耐之後, 都係決定換, 因為搬左入去就換唔到喇, 同埋我同男朋友都鍾意淺色地板呢~~

之後就係無縫地板同地磚之抉擇, 開頭好鍾意地板, 暖d靚d; 但人人話難清潔, 唔襟用

再睇, 原來而家好興木紋磚, 雖然唔暖, 但滿足到男朋友鍾意木地板的部分要求啦

********************************

我地前一晚上去只係剷左牆, 第二日上去已經拆晒所有野喇

拆野真係好快@@

跟住就到畫電掣位同改煤氣爐頭

煤氣爐頭循例搵煤氣公司報價

都係逃唔過話要搭棚改喉

我個裝修師父話唔使搭喎, 伸隻手出去都已經做到

但煤氣公司始終要做足, 一定要搭掤

結果師父幫我搵左相熟有煤氣牌的師父幫我, 價錢平過煤氣公司一半有多呀!

就係要將煤氣位改去水喉位隔離喇, 因為煤氣個位變左擺洗衣機

水喉都改好左, 加左條銅喉, 因為洗手盤個位又係改左

********************************

畫電掣都令到我同男朋友鬧交, 好唔開心, 因為新屋多左好多拗撬

睇黎係我太緊張>"<

呢個係電視牆位, 因為電線要入牆, 要造一條膠喉走電線

因為呢個位整幾高, 我地又意見不合

太高又驚睇電視唔舒服, 太低又驚電視遮唔到, 整喉的目的達唔到

呢度係睡房的電視位, 又係因為驚瞓係度睇電視的高度而左諗右諗

書房男朋友堅持要整多d電掣, 話唔想第時倚賴晒拖板, 總共整左4個13A

不過整多左又無壞既, 最怕唔夠用

仲有廚房的改動因為最大, 加的電掣最多

全屋總共整左>10個電掣, 我諗唔算多掛

不過整一個電掣好貴, >10個已經要幾千蚊

裝修的錢仲倒水過結婚

下次講下買磚