24W 6個月喇!

踏入6個月, 進入2nd trimester的最後一個月

代表懷孕honeymoon日子開始倒數喇!

回想頭3個月, 每日心情好忐忑, 擔心小b發展, 時間過得好慢, 人又好攰

一過左oscar關口就放低心頭大石, 成個人好似輕鬆左好多

踏入第4個月, 真係突然叮一聲咁, 體力回復

肚未開始大, 步履好輕盈, 有時會唔記得自己有左, 感覺好happy

20週時結構pass左又放低另一舊大石

呢2個月時間過得真係好快, 淨番一個月蜜月期, 真係要好好享受呀

妊娠反應:

而家每日留意住小b的胎動情況

我無刻意數每日要郁到10次, 但會確保佢早午晚都有郁

最搞笑係我發現小b好似返office工咁, 逢星期六日及假期就郁得少d

問過助產士姑娘, 佢話因為我假期食少d野, 小b吸收少左糖份郁動就會少d, 好正常

我估可能因為放假唔似返工咁坐定定, 相對無咁易feel到胎動

上樓梯同行斜路都會索氣, 要慢慢行, 其他都好ok, 健步如飛

坐骨神經繼續痛, 只要平瞓壓住, 起身時就會扯住痛

瞓覺轉身都要小心

希望踏入3rd trimester唔會惡化啦

身型:

5月時個肚突然好明顯大左, 不過之後又慢番落黎

但覺得佢日日都有大少少

唔知幾時正式進入猛長期呢

同事啱啱先發現我有左, 可能係我多數著鬆身衫佢地唔覺

不過朋友都話我個肚細

去醫院check醫生話肚size正常, 照超聲波小b size都正常

所以唔怕啦~

早兩日無意中發現肚臍下的淺啡色妊娠線出現左喇

無唔開心, 反而有d興奮, 因為係懷孕的特徵呀

不過其他妊娠紋就唔需要喇

戒口:

繼續戒生o野、海鮮、濕毒, 辣o野都好少食喇

有時同老公講好想食某d野, 佢會叫我自己mark低個list

等第時帶我食番晒

隨住小b越黎越大, 同老公感情越黎越好

feel到老公好錫自己, 樣樣以自己為先

成日講肉麻說話, 語氣又溫柔左, 以前無咁架...haha

終於明白點解有人會好鍾意懷孕的感覺, 真係集萬千寵愛在一身

我都有少少鍾意呢種感覺, 搞到我都想時間過慢d呀

BB用品(一) 衫仔

買bb用品, 買極都買唔完

雖然細妹話7個月開始先買bb野, 但當知道小b係男仔後, 忍唔住就開始左買野行動

(相信如果小b係女仔, 行動會嚴重升級!)

因為屋企空間有限, 書房暫時唔會改裝

只會買個櫃仔放小b的衫仔用品, 但又唔想咁早買, 所以暫時只係敢買d細件野

其他大件野唔敢買住

不過今個月係各大百貨公司大減價的大日子, 要開始入貨喇

錯過左就要到年尾11月

衫仔

細件野主打當然係衫仔, 真係超級得意

初頭行街見到都好想買, 但真係唔平

分分鐘貴過大人衫, 所以一直忍住

主要趁開倉買, 

前後去的3個開倉:

尖沙咀bazaar

主打賣小朋友野, bb衫仔唔算好多, 好開心俾我買到toonsland 芝麻街底衫系列

之前係千色店見到已經好鍾意(唔係件衫特別靚, 純粹因為我係elmo fans), 但好貴
一件袍仔幾十蚊, 多少少布的夾衣有d要過百蚊

今次開倉平過半價, 平均$20就有和尚袍仔, 買左件兩用袍都係幾十蚊, 可以狂掃, 埋單$200幾蚊咋~

佢仲有d hello kitty, 新幹線的袍仔賣, 有好多媽媽掃架~

 

葵涌工廠區

係靠其他準媽媽share先知, 主力賣carter's呢個外國牌子

其實taobao都有好多呢個牌子的product, 但我唔敢係taobao買小b的用品
尤其是接觸到皮膚的衫仔, 始終驚qc無咁好

呢個開倉都幾隔涉, 去到地方好細, 要慢慢揀

最後揀左兩件衫仔, 一件厚身袍, 2對gap襪仔, 一pack3條索汗巾

另外買左一厚一薄包被, 埋單都唔平, 要$400幾蚊, 送左2條口水肩

後來發現佢原來個個月都會開倉, 同埋花園街好似賣得仲平, 可以唔再去lu~

旺角花園街開倉

又係靠媽媽share, 呢個開倉真係必去, 仲可以不停咁去!

因為佢賣的野真係又平又靚, 大部分都有牌子, 應該係出口貨的貨辦

由初生到幾歲都有, 返貨又多, 上到去真係不自覺咁買唔停!

買左8件夾衣、2件衫仔、3件袍仔(mides!)、3條口水肩, 大部分係next

最平$10, 最貴都係$45, 買左16件只係$350落樓, 真係好抵! 

仲要件件我都好鍾意, 睇相都覺得開心

不過暫時唔可以再去住, 上到去又實忍唔到手買, 所以要禁足呢個地方

但我見親身邊有bb的朋友都忍唔住推介佢地去呢個地方尋寶

呢件係o係fb見ralph lauren有特價係外國訂返黎, 留俾小b扮靚靚時著

加埋之前係gap、雞仔嘜買的、細妹俾的, 仲有驚朋友送果d
衫仔已經夠著有餘, bb又大得快, 再買就好嘥錢, 所以要收手喇!

21W 變化

終於踏入孕期一半喇~

頭3個月係日子過得最慢的時候

過左3個月突然時間過得快左好多

話咁快已經5個月多d

踏入5個月, 身型變化大左好多, 變左個真真正正的孕婦

 

妊娠反應:

Touchwood好好彩小b繼續好乖, 無作嘔作悶

過左4個月, 攰的感覺消失左8成

不過出街2個鐘開始都係會攰, 但唔似之前咁要返屋企瞓覺叉電

便秘問題無左喇, 食生果同飲水幫助好大

坐骨神經痛問題持續, 呢樣好難解決, 希望遲d做番瑜伽同政府的產前運動班會好d

 

身型:

個肚大左好多呀, 之前人人都唔覺我大肚, 而家孕味出晒黎

不過都係著貼身衫先明顯, 著鬆身衫要好留意先見到

大腿同pat pat繼續係重災區, 無得救…

最近產檢發現體重升得快左d

頭3個幾月只係重左3磅

但今次個半月竟然重左3.5kg, 即係差唔多8磅

雖然唔算超標, 但姑娘都提醒後期要重得好平均, 成個孕期最理想係重12kg

如果唔係好易過重

之後真係要戒多少少甜野, 尤其是飲品

照鏡成個身型大隻左, 而家真係開始變肥婆喇

 

戒口:

辣野戒左9成喇, 總算忍到口

耐無食有時食米線食酸辣都覺得辣

其他野繼續戒, 雖然好多誘惑, 不過我都堅持到

希望bb身體健康d

 

 

呢幾個月聽左好多講座, 覺得最有用始終係醫院果d, 資訊性高好多

其他品牌搞的都係為左拎禮物

最豐富應該係雅培、美素佳兒同美贊臣

但我仲未成功報到名

21W2D PMH見助產士

編左入助產士門診, 唔使轉去健康院

終於發現多一個好處!

 

今日姑娘幫我檢查個肚時, 覺得有d實

問我係咪平時都係咁, 驚我有宮縮

我話有時好似會 (其實我唔係好識分)

跟住問會唔會痛, 我話唔會, 反而係下面有時有少少扯住痛

我又有提話覺得多分泌, 有時會黃黃綠綠咁

姑娘就話可以幫我搵醫生睇下

我話今日可以即刻睇?!

姑娘話係呀, 呢度好處就係同醫生只係隔離, 可以即刻安排

 

跟住出去坐, 姑娘話安排左一位副顧問醫生幫我檢查

心諗…唔知係咪又係上次果類hea醫生

等左半個鐘左右, 入房見到原來係好後生的女醫生

仲要勁好人, 超級nice

檢查過程雖然要用鴨咀夾, 但唔會有唔舒服感覺

醫生仲俾好多定心丸, 話肚實係正常, 因為第一胎多數實d

只要唔會規律性痛就得

下身分泌亦都好正常, 如果化驗後有需要先會聯絡

整個過程感覺真係好好

最後我個case可以繼續由助產士跟番~

 

20W6D 4th私家檢查 (照結構)

終於等到今日!

之前一直好緊張, 希望結構順利

因為pass左呢一關對小b黎講係好重要的一頁呢!

 

婦產科醫生介紹左另一個醫生照結構

不過只得DVD, 我又貪心想要相, 所以上網再搵下有無其他媽媽推介

大熱應該係結構權威林勇行醫生

不過有媽媽話佢cool cool地唔多答野, 老公話好似唔係咁好

最後book左都有好多媽媽介紹的鄧悅翹醫生

大部分人話佢好細心, 呢樣係我同老公覺得最緊要o既

費用$1500有report, DVD, 2D and 3D相

 

一早10點去到診所, 只有一對準父母o係度

應該好快可以見到醫生喇~

等左15分鐘就入去

醫生好斯文, 講野細細聲, 照結構時要留心d聽

真係幾細心, 每一part都慢慢睇

如果bb位置唔好會睇左其他部位先, 返轉頭再睇番

睇到心臟或其他器官血管會有紅色同藍色顯示

又會度下頭仔等部位大細, 數下手指、腳指

一邊睇醫生都話正常

我自己都會主動問咁o既size係咪即係正常、bb有無鼻骨等

去到照性別, 醫生有問知唔知囝定囡

我話之前照左係囝囝, 醫生就再confirm仲影埋佢的JJ俾我地睇

跟住照bb側身時話呢個角度好明顯喇

又會睇下胎盤位置o唔ok, 胎水量同聽bb心跳聲

 

係照小b個樣時有少少阻滯

因為bb遮住左, 要篤幾下個肚等佢塊面轉過黎

先睇到五官同有無兔唇

最後影埋bb個樣就完喇

不過都影左幾次, 因為bb俟左埋胎盤, 遮左個樣

最後影左幾次揀左一張比較清楚就照完

 

照完醫生再問有無咩野想問

我都係問番bb係咪符合生長週數(醫生話好ok)

胎動情況(醫生話胎動時密時疏係好正常的情況, 因為而家週數未大, 係會無咁穩定)
原本想問醫生拎鈣片, 最後唔記得左

整個過程大約20分鐘

 

 出到去問姑娘(好好人)填埋入媽媽會的form

揀左美素佳兒2罐初生奶粉sample就走喇~

好開心好感恩bb一切正常, 而家重380g!

終於放下心頭大石, 可以盡量買bb野喇