HiPP - 嬰兒護膚膏

除左食之外, BB皮膚都係令好多媽媽煩惱的地方

諵b初初出世皮膚幾好

無咩濕疹等問題

點知後來帶過一頂帽之後

眉毛對上額頭位置及頭皮就出現濕疹 T.T

仲蔓延到耳仔同周圍位置

雖然唔係好嚴重

但果時我地兩公婆已經好擔心

仲帶過佢去睇醫生

醫生開的都係有類固醇藥膏

始終治標唔治本

我都唔敢幫諵b搽咁多

 

當時為左解決諵b的濕疹

我買左各類型的cream俾佢搽

但唔係隻隻得

試到隻有效的就叫工人姐姐每隔1個鐘搽一次

好彩慢慢過左半歲濕疹問題開始紓緩

最後剩番耳仔、咀邊同手臂摺位間中會翻發

但已經好好多喇

 

勤搽cream保濕係避免濕疹再出現的其中一個方法

我而家日日會幫諵b搽d天然保濕cream

HiPP呢隻嬰兒護膚膏

敏感及濕疹皮膚都用得

天然有機杏仁油, 不含人工成份

啱晒諵b用 

 

 

唧出黎搽上手好快推開同吸收

一d都唔笠

仲有陣淡淡的天然味

 

搽左一排, 手臂摺位唔再紅喇!

 

諵b, 唔該支cream係搽唔係食架!

 

咀邊紅紅地的地方, 搽多一排都消失左lu, 真係好好用~

 

HiPP喜寶嬰兒護膚膏

HiPP喜寶嬰兒護膚膏蘊含豐富天然有機杏仁油，有效滋潤和保護幼嫩肌膚。容易均勻塗搽，有效保持皮膚柔滑。適合全家使用，可同時用於雙手。

敏感和濕疹皮膚適用

敏感皮膚適用：沒有礦物油成份，有效降低皮膚敏感風險；不含人工香料，不含精油，不含PEG乳化劑，不含對羥基苯甲酸酯

諵b 10個月

踏入10個月的諵b

越黎越似個曳曳小朋友

分離焦慮徵狀都好明顯

又識發忟憎

比較之前麻煩左好多

食

2固3奶

試左新野：洋蔥、鮮淮山、百合

繼續為食，咩都鍾意放入口

有野食會開心到跳舞

有時去食野，都要帶定零食或者買定麵包

如果唔係諵b唔肯放過我地

每日時間表：

7:30   起身

8:30   飲7安奶

12:30 食粥

16:30 飲7安奶

20:00 食粥

23:30 飲7安奶

中間不定時俾生果同零食

諵b食量唔少，但佢又唔會好肥

仲係中細碼，keep住生長線我就ok喇

便便

究竟點先解決到呢個問題？

水，一有時間就俾佢飲

開奶茶，除左病停之外每星期都煲

餐餐粥都有瓜菜

老公話問題出係奶粉度

諵b而家飲holle 1

之前試過想轉雀巢2

點知條頸好似敏感咁出晒粒粒

唯有繼續飲番holle 1

原本諗住1歲先直接轉3號

而家plan緊轉2號先

食3個月先轉3號

老公堅持揀illuma

買一罐$500又唔知諵b飲唔飲

如果唔飲好肉赤

好多媽媽話食左好，希望有改善啦！

(好彩寫呢篇blog的早2日收到illuma電話，會送1罐2號，簡直係及時雨呀！)

行為

越黎越懂性

同明顯痴身好多

喊時就不停叫mama
心情靚時就不停baba
跌親喊時叫mama要我抱

Daddy伸手都唔制
雖然有事先向我求救
但聽到好心甜架

主動扭抱

係咁拉住你件衫向上爬要抱

唔理佢會扮喊直至抱起佢

見到陌生人有時會喊或者呆

但有時搭車又會主動撩人玩

我諗都係睇心情

成日要周圍行

唔鍾意困係床

原來諵b都係大膽小朋友

轉身時會放手

佢好似預左有人一定傍住佢咁

結果當然試過跌落地喊啦

企係度時將手上的玩具放落地下

再踎低執番

不停重覆上落

出第7隻牙仔喇

上面4隻下面3隻

可能佢知道出多啲牙可以早啲食大人野

咁快出第7隻

越黎越鍾意發忟憎

唔高興識"登行"晒個人發脾氣

仲要嗯嗯聲

有時見到佢咁都有同佢講nono

今個月去playgroup後又病

一個月病一次心痛死

好內疚以為自己傳染佢

後來發現有幾個bb同時病

先知道係被傳染

黎緊先停一停唔去住喇

bb病真係好慘架，擔心到死

知道佢好番真係feel到鬆一大口氣

呢啲零食全部都無我份

又玩韆鞦，幾開心

食手指

 

開心笑

古靈精怪

烈火戰車

病時同佢去公園吸下新鮮空氣

諵b下水禮

今年天氣特別早熱

夏天一早開始左

人人都試左下水禮

諵b因為早2個月病

一直唔敢同佢落水

驚佢凍親、飲泳池水污糟會再病

我已經承受唔起佢病喇T.T

終於7月中等到佢健健康康

老公又得閒

天氣又好

天時地利人和ok

可以進行諵b首個下水禮

連地點都躊躇左好耐

最終揀左青衣泳池

呢件泳衣啱啱好咋

諗住買fit身落水無咁凍

而家諗番好似太緊=.=

諵b著左好唔慣咁

我一拉完拉鏈擺佢坐低影相就喊

不安緊張擔心寫晒上塊面XD

好彩落水好順利

果然係泰山崩於前而色不變的bb

呢樣似我

無論心裡面幾淆底

都會頂硬上唔縮沙XD

由開頭唔知做咩到後來warm up完

識得拍水同盡情踢腳

仲不停偷飲泳池水

見到佢咁叻叻真係好開心

呢個小朋友又成長左一步喇！

（可惜泳池唔可以影相，好想影低佢的泳姿呀！）

HiPP有機米糊 - 純米

諵b而家2餐固體都係食粥仔

不過屋企都會keep住少少米糊存貨

以備不時之需呀

 

第一次試HiPP米糊

試下配埋粥仔配料睇下諵b鍾唔鍾意先

今餐食譜係紅蘿蔔洋蔥米糊

 

HiPP係純米糊, 倒出黎的米粉磨得好細好滑

顏色仲好純白

 

今次用左HiPP的活泉水開米糊

睇下用水開會點先

 好快就攪埋, 睇下texture唔錯

用avent蒸煮機一次過蒸蘿蔔+洋蔥, 再攪一攪變蓉好方便

加落米糊, 質地好滑呀

俾諵b望下先, 佢急不及待用手去拎= =

 

見到我拎起支匙羮即刻捉住擺入口, 睇黎好鍾意食 haha

食飽飽飲番啖開奶茶清一清腸胃, yummy

 

HiPP有機米糊 - 純米

含維他命B1 * - 發展神經系統的重要元素 *法例要求

珍貴有機穀物，容易消化。

準確分類，成分簡單

有機

諵b證件相

報學校要幫諵b整證件相

之前上網睇到可以用software將日常生活相排成證件相格式

再拎去曬4R就得

又方便又平

自己好鍾意諵b呢張相的笑容

就揀左黎整

不過我唔識用photoshop執做白色背景

變左穿崩相 haha

但我呢個求其媽媽照曬左，報n班唔怕掛，笑容搭夠啦~

早2日準備幫諵b申請特區護照

要正正經經

於是出去快圖美影

預左效果普通不過最緊要規格啱

都係打算用黎申請證件就算

影時諵b爸爸係下面扶住

我係相機後引佢笑

不過佢好呆唔知咩事咁

諵b爸爸就輕輕力唧佢

諵b交差俾左個微笑

諗住效果普通點知有驚喜

影得好滿意呀！

原本有打算正經報學校時俾貴啲出去studio影smart靚仔相

而家呢張我諗都頂得住檔掛

可以慳一筆

溫馨提示:
影證件相記得著深色衫呀, 我唔知著左白色polo領衫仔諗住型仔d
好彩帶左外套可以著
但隻馬仔好礙眼...

題外話：

見到諵b呢張相成個小朋友咁

兩張相差3個月就無左bb樣喇

平時我睇諵b仲覺得好bb架

真係唔捨得佢大得咁快T.T

諵b 9個月

諵b其實已經10個月喇
成長記錄落後左一個月
要寫快d先
每個月過得太快
有時真係唔記得佢呢個月有咩顯著成長
得閒係記事薄mark低先提醒到自己咋

食
最鍾意睇佢食野
每次見到大人食野
佢一係好可憐咁望住
一係笑笑口咁對住你想你餵佢
一係好主動咁快速爬去你身邊擘大口
真係好好笑架!

咩都鍾意食
原來為食的小朋友好可愛
我知道bb唔鍾意食野係好苦惱的一件事
諵b算好乖
等爸爸媽媽可以煩少一樣野

便便
都係2-3日先一次
多數好順暢
但有時突然會好辛苦
要大人幫手先去到
見到佢辛苦到喊我都好心痛
其實已經餐餐都有瓜菜
究竟點解會咁辛苦呢?
呢個問題由佢細細個已經好困擾
都係未搵到好理想的解決方法

 

成長 / 反應

認人已經好叻
見到我、爸爸、工人姐姐、婆婆、公公、幾個阿姨都會好開心笑
見到陌生人就呆
當我消失係佢視線範圍會叫同扮喊
不停叫mama

 

想人抱就識半個身向住你同伸開手要抱
扭抱多左好多
我地係諵b細個時特登唔抱佢咁多
因為工人姐姐湊
唔想佢慣左要人抱
而家大左反而抱的時間仲多
不過大個左我地都放鬆左好多
知道佢呢個時期真係需要安全感
同埋小朋友可以抱的時間唔多
有得抱真係要珍惜

 

自從識扶住野企之後
而家已經行動自如喇
只要有野扶住就可以不停行
想坐低時識得慢慢坐
唔會好似以前咁一下坐低向後跌
有時仲好大膽想放手行

 
呢個月去完playgroup之後就病
睇醫生話喉嚨發炎
自從呢次病左開始就要人抱住氹瞓覺
以前係擺佢落床度自己瞓
仲要跟我地瞓大人床
擺番落床仔就喊
我地都由佢喇, 俾佢跟我地瞓
諵b仲好反瞓, 霸埋我個位
搞到我地好迫呀>"<

諵b係一個好嗲的bb
好似瞓覺咁, 明明瞓著左擺左落床
瞓到咁上下半睡半醒會起身
爬埋黎我度伸手要我抱佢瞓
或者係都要轉身直至痴住我地先肯繼續瞓
有時放假朝早咁樣痴住一齊瞓好冧架


 

一直以為只係出下面2隻牙

點知有一日佢大笑時突然發現原來上面出緊4隻

即係同時出緊6隻

嚇死我呀！

度過左第一個母親節

參加爬行大賽

來自星星的諵b, love you!