35W5D 8th私家+政府檢查

呢次檢查真係令我一殼眼淚, 喊左成日...

 

自從上次作早產入院, 事隔3個星期

覺得呢段期間個肚好似無咩大, 個人胃口又細左

果然去到私家診所一磅重, 竟然輕左差唔多2磅

雖然話未食早餐, 但無可能輕咁多

呢個時間應該每個星期重大約1磅, 即係應該重3磅

而家輕左2磅, 前後少左5磅, 心知不妙

已經好擔心

入到房醫生一照

話胎水少

bb細左, 頭肚腳都唔夠

再話個肚細

即刻忍唔住眼紅, 超級擔心

醫生話要多d休息胎水先會多番

每日收工返到屋企就瞓床

唔使真係瞓, 可以瞓係度睇電視睇書

唔好操勞, 有咩俾晒老公做

一出醫生房已經忍唔住喊

平伏左少少心情去食lunch

到下午去瑪嘉烈見助產士姑娘

佢度肚時我問佢細唔細, 佢話係偏細, 大約32-33週肚

佢都估我個b係細隻b

我同佢講今朝私家的檢查, 俾埋張超聲波佢睇

佢話頭同腳都還可以, 肚就差得比較多, 會安排我見醫生

助產士問左醫生意見後
安排我照超聲波睇下胎水同臍帶血流量

胎水真係偏少, 擲界...好彩臍帶血流量正常

跟住話我之前作早產再加埋今次胎細

唔可以再由助產士跟, 要俾番醫生, 踢左我出助產士小組>"<

再安排左2星期後返醫院聽半個鐘bb心跳, 再見醫生覆診

之前咁多次檢查, bb都好乖好正常, 從來唔使我擔心

懷孕咁耐以黎無出現過驚嚇事

bb又錫住自己, 無嘔無唔舒服

以為到左後期更加穩定唔使驚

樣樣都放鬆左, 無日日飲奶, 只係間中食蛋

諗番自己過去呢3個星期, 工作上有好大轉變

每日一張開眼就諗, 心情煩左好多, 日日忐忑不安, 食量亦少左

亦令心情去晒工作度, bb應該感覺到

再加埋恃住自己仲係輕盈, 想趁bb未出世去多d街

成日去呢度o個度, 無好好休息, 令到bb咁樣, 好內疚

黎緊呢幾個星期要谷番bb

每日飲3支/包奶, 食烚蛋

唔肚餓都迫自己食多d野, 等自己重d

希望追得幾多得幾多

亦希望bb加油, 出世大隻d, 健康d