諵b報N班 - 我的想法

係香港呢個教育環境
要獨善其身要無比堅定及有無窮意志
我都不停徘徊係呢個旋渦
當一個人時我清楚自己想要咩
但當身邊出現不同意見時, 又好易陷入俗稱"怪獸家長"的想法
(其實何謂怪獸家長無絕對定義, 有d人覺得帶小朋友上playgroup你已經係怪獸家長...)
做左人父母, 我更加唔會隨口話人地係"怪獸家長"
我知道有d父母會半歲帶bb返pg, 買幾萬教材, 學好多野
我覺得呢個係佢的個人選擇
旁人唔應該因為自己的價值觀就定義其他父母係"怪獸家長"

對我黎講, "怪獸家長"係指過份將自身的期望套落小朋友身上
而忽視左小朋友的需要
我會用呢把尺黎衡量自己有無變身 "怪獸家長"
提醒自己唔好被其他人牽著走而忽視自己的想法

坊間幼稚園有好多類別
有happy school, 讓小朋友從遊戲中學習, 適合喜歡玩, 活潑好動的小朋友
有催谷型, 希望小朋友從小培養學習習慣, 適合文靜, 服從性強, 希望升讀傳統小學的小朋友

曾經有朋友講過
如果幼稚園係happy school唔谷, 上小學就會追得好辛苦, 到時小朋友的壓力更大
我都迷惑過, 係咪應該搵間注重學術的學校?
但諗深一層
如果呢個理論成立, 為左小朋友上小學無咁辛苦, 要由幼稚園開始谷, 再為習慣幼稚園谷的學習模式, 咁咪要由一出世就要開始谷...
咁樣唔得喎!
再諗深入d, 我對諵b的童年期望
係希望佢有一個健康愉快童年
有健康的身體先可以專心學習
知識係學無止境
我希望培養佢的
唔係有形的知識, 學識幾多個abc、識讀幾多個英文生字
而係最重要又最抽象的學習興趣
只要對學習有興趣, 哪怕佢而家唔識果幾個英文字
識遲幾個英文字無問題
但錯過培養佢學習興趣的呢幾年就追唔番

點樣培養佢的學習興趣係一門好深的學問
我唔係老師, 第一次做人父母
無經驗去分析
但我知道愉快的學習環境係一個好重要的因素

另一樣我重視的係語言學習
自問語言OK但唔算叻
長大後更加明白語言好讀書唔會差得去邊
出黎做野語言更加重要
我計劃諵b會讀番傳統小學(目標係我自己畢業果間)
學好中文仍然最重要, 其次先係英文普通話
所以想搵間有外籍老師的學校
培養下佢的外語興趣, 等佢多d機會接觸外語
可惜係有學券而又有外籍老師的學校唔多
大部分重視英普教育的都係無學券學校
(始終無學券學校資源多d, 加上要用呢樣做招徠吸引家長每個月俾幾千蚊讀書)

講左咁多
其實我唔抗拒谷的學校
只要佢返學開心就可以
我亦唔會堅持佢要入谷的學校
我始終相信
人生係一場馬拉松
小朋友年紀細時有形的發展差別會好明顯, 大一個月可能已經好唔同
但當年紀漸長, 呢種差別只會越縮越窄
大家的知識程度唔會差好遠
相反性格同心理呢d無形的特質差別會越黎越顯著
呢樣係我更重視既野

呢個世代報學校的學問何其深
想當年婆婆幫我報學校, 只係報一間就可以
邊有而家咁諗咁多
仲要擔心報咁多間都驚唔收