諵b報N班 - 面試三

11月15日(六)
今日本來有2間學校in
最後只去左一間

呢間學校環境優美
有個好大的露天活動空間
小朋友朝早會係度做早操
有好多設施鍛鍊大肌肉
又有地方俾小朋友自己種植物
種完會用番黎整野食
學校注重美術, 有一個美術室
每級一班, 每班15個學生
有2個班主任, 屬小班教學
有學券, 全日班
不過以有學券學校黎講, 佢的學費算貴
員工學費會平少少
可能有優先取錄

要數缺點的話
佢收生數目少, 口碑好
所以相對競爭都幾大
地點都係一個憂慮
始終對我黎講係比較遠

咁點解報呢間學校呢?
係因為佢就係我工作的地方裡面
我的如意算盤係
每日可以同諵b一齊返學一齊放學
黎緊考左車牌, 自己駕車就更方便
不過後來發現, 原來學校每日4:30就放學
雖然可以最遲6點先湊走小朋友
但小朋友就要見住同學仔走晒自己留低(我聽到都覺得慘)
同埋我6點收工, 真係啱啱好湊到佢
萬一OT就麻煩喇

不過都係考左先
呢間學校條件真係唔錯
臨去面試前仲帶左諵b去我office玩下熱下身
佢好好奇, 周圍行同我地玩躲貓貓 haha

去到學校, 我同諵b爸爸堅決唔放佢落地玩d遊樂設施
知道佢一玩就唔願走
好彩好快叫名入課室
由諵b爸爸陪佢
其實我都猶豫左一陣
擔心佢唔知搞唔搞得掂
好彩事前上網睇過話唔會問家長野
咁就唔使擔心諵b爸爸(佢真係會亂答架= =)

事後講番都係考下疊積木, 入圖形
指眼耳口鼻
送禮物講謝謝
爸爸話諵b好多都做到, 仲好開心咁玩
原來爸爸陪in有意想不到效果
爸爸平日的角色係陪玩, 啱晒呢種面試模式
如果係我陪, 諵b會好倚賴我
咩都會叫我幫佢或俾我做
有時做媽媽真係要放手
in完就俾諵b玩夠先走
佢玩得好開心呀!

學校有另一樣印象深刻的地方
係校長老師都好後生, 但感覺好nice
同埋好多義工家長返黎幫手
睇黎家校合作好緊密
面試期間都見到幾個員工子女考
我諗員工都未必有著數
呢間學校真係唔錯
暫時係我同諵b爸爸第二最愛呢