諵b 17-18個月

一歲半喇！

又踏入一個新階段

呢個階段真係學習黃金期

學野好快

諵b呢個時期最明顯係說話發展

開始做到聽到就講到

同埋唔止單字

牙牙學語的小朋友真係好可愛！

大肌肉發展

諵b 14個月識行

到而家識跑喇

會係屋企由房衝出廳

開始唔肯坐車要自己行

因為日日要來回湊佢

我每朝都會推車仔

但到收工接佢時就唔肯坐

有時推得車黎又要顧住佢行都幾lei hea

不過有啲小moment

可以見到諵b係一個幾窩心的小朋友

有時佢行行下開始攰就停低想我抱

一手抱佢一手推車真係攞我命

我抱起佢就同諵b講

「媽媽抱你隻手好攰喎」

諵b就會表示落地自己繼續行

寧願自己攰啲錫住媽媽

堅持由婆婆家拖番屋企

行左超過15分鐘

都幾有毅力😂

爬上爬落已經無難度

好彩佢係謹慎小朋友

會慢慢上落

到今日為止

佢都好乖無自己走入廚房或廁所呢啲危險地方

小肌肉發展

諵b好鍾意手藝野

由細到大鍾意玩貼紙

地下dd污糟或有粒紙碎都會執起

對穿珠仔呢啲小手工好有興趣

之前無教過佢

去面試時要考穿珠佢好專心咁完成

自己會剝蛋殼跟住食蛋

好快手就剝好

說話發展

識講多左好多野

基本上識叫人

除左叔叔未識

哥哥、姐姐、姨姨、伯伯、婆婆、公公、嫲嫲、爺爺、舅父都識叫

不過成日怕羞唔開口

有時佢講左啲詞語我都要估下先明

有啲都係估唔到

最搞笑係由叫媽媽

變左叫媽me

尋日無端端叫媽me or

學講野真係好可愛

其他發展

18個月嗰日學識左紅色

問佢咩色會話red

有時咩顏色都講red XD

食飯如果係有興趣的食物可以全程坐定自己食

相反無興趣就食幾啖停口

最鍾意大人食咩佢食咩

而家都俾佢跟大人食飯

不過以啖味為主

出去食粉麵都會過水

見到大人用筷子又要跟

睇黎個個小朋友都係咁

識表達去poo poo

vee vee就未識

等天氣熱啲先幫佢戒

一次過出9成大牙

見到佢都辛苦

所以前排脾氣好忟憎

發脾氣仲起手打人

俾我同諵罰企

而家大聲話佢會自己喊住走去罰企

好搞笑

企到咁上下就會走番埋黎攬番你

真係嬲佢唔落

而家心情好好識冧人

會同人對望甜笑

跟住頭踫頭錫錫

出街會同人hi bye

依然鍾意大過佢的哥哥姐姐

近來好鍾意排櫈

鍾意參與大人工作

識貪靚，會照鏡，學大人搽cream搽粉

夾髮夾幾開心

俾人讚就開心

鍾意小動物，雀仔、魚、貓、狗

好愛生果，尤其多汁超甜士多啤梨，真識食

間中有俾佢飲盒裝奶，諵b都好鍾意

間中俾佢畫下野

而家識望鏡頭笑，好似好大個仔咁